សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ តាមរយៈ (ព័ត៌មានបឋម) បានឱ្យដឹងថា ៖ នាព្រឹកថ្ងៃទី ២៨ ខែតុលា ឆ្នាំ២០២៤ មានករណីរថយន្ត៣គ្រឿងបុកគ្នាបណ្ដាលឲ្យជនជាតិចិនពីរនាក់ស្លាប់នៅកន្លែងកើតហេតុ ។ ហេតុការណ៍នេះនៅតាមបណ្ដោយកំណាត់ផ្លូវជាតិលេខ១ ក្នុងចំណុចភូមិពោធិ៍មាវ ឃុំគគីរធំ ស្រុកកៀនស្វាយ ខេត្តកណ្ដាល ។
បើតាមប្រភពពីកន្លែងកើតហេតុបានឱ្យដឹងថា ៖ មានរថយន្តបង្កមួយគ្រឿងម៉ាករ៉ាត់ទ័រពណ៌ខ្មៅស្លាកលេខកម្ពុជាNQPKARIN បើកបរទិសដៅពីកើតទៅលិចបើកបរដោយជនជាតិចិននិងអ្នករួមដំណើរបីនាក់ទៀតមិនស្គាល់អត្តសញ្ញាណមកដល់ចំណុចកើតហេតុបានឡើងវ៉ាជែងរថយន្តមួយគ្រឿងម៉ាកហាយឡេនឌ័រពណ៌ក្រហមស្លាកលេខ ភ្នំពេញ -2AS-4195 បើកបរទិសដៅស្របគ្នាក្នុងហេតុការណ៍ឡើងវ៉ាជែងនេះបណ្ដាលឲ្យទៅបុកនិងរថយន្តក្រុងក្រុមហ៊ុន ដាន ដាន កម្ពុជា-វៀតណាម ដឹកអ្នកដំណើរបញ្ច្រាសទិសគ្នា ពីលិចទៅកើតឆ្ពោះទៅក្រុងបាវិតបង្កឱ្យបុក ចំពេញពីមុខ មួយទំហឹងបណ្ដាលឲ្យអ្នកបើកបរនិងអ្នករួមដំណើរអង្គុយពីមុខស្លាប់បាត់បង់ជីវិតចំនួនពីរនាក់នៅនឹងកន្លែងកើតហេតុអ្នករួមដំណើរអង្គុយពីក្រោយ២នាក់រងរបួសស្រាល។
ចំណែករថយន្តហាយឡេនឌ័របានជ្រុលចង្កូតទៅបុកជាមួយនឹងរថយន្តបង្ករម៉ាករ៉ាត់ទ័របណ្តាលឲ្យរងការខូចខាតយ៉ាងដំណំផ្នែកខាងមុខ។
បច្ចុប្បន្នរថយន្តទាំងបីគ្រឿងត្រូវបានកម្លាំងជំនាញចរាចរណ៍នៃអធិការស្រុកកៀនស្វាយចុះទៅពិនិត្យនិងធ្វើការវាស់វែងរីឯសាកសពជនរងគ្រោះ រង់ចាំពិនិត្យនិងប្រគល់ជូនសាច់ញាតិធ្វើបុណ្យតាមប្រពៃណី ។ ចំពោះព័ត៌មានលម្អិតចាំផ្សព្វផ្សាយបន្តទៀត។
សូមបើកបរគោរពច្បាប់ចរាចរណ៍ ដើម្បីជីវិតខ្លួនឯង នឹងអ្នកដទៃ ថ្ងៃនេះ ថ្ងៃស្អែក គ្មានករណីគ្រោះថ្នាក់ចរាចរណ៍៕
ដោយ ៖ សិលា
