ប្រធានាធិបតីរុស្ស៊ីបានចុះហត្ថលេខាលើសន្ធិសញ្ញាសហប្រតិបត្តិការ ការការពាររួម

ចែករំលែក៖

ថ្ងៃទី១០ ខែវិច្ឆិកា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ចប់ការផ្តល់សច្ចាប័នលើកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយកូរ៉េខាងជើង។

យោងតាមទីភ្នាក់ងារសារព័ត៌មាន RT របស់រុស្ស៊ីបានផ្សាយថា អនុស្សរណៈនៃការយោគយល់គ្នាទាក់ទងនឹងកិច្ចព្រមព្រៀងត្រូវបានចុះហត្ថលេខាដោយប្រធានាធិបតីរុស្ស៊ី លោក វ្ល៉ាឌីមៀ ពូទីន និងមេដឹកនាំកូរ៉េខាងជើង លោក គីម ជុងអ៊ុន ក្នុងអំឡុងដំណើរទស្សនកិច្ចទៅកាន់ទីក្រុងព្យុងយ៉ាងក្នុងខែមិថុនា ឆ្នាំ 2024 ។
សភារបស់រុស្ស៊ី (សភាតំណាងរាស្រ្តរុស្ស៊ី) បានផ្តល់សច្ចាប័នជាឯកច្ឆ័ន្ទលើកិច្ចព្រមព្រៀងនេះនៅចុងខែតុលា បន្ទាប់មកនៅថ្ងៃទី ៦ ខែវិច្ឆិកា ក្រុមប្រឹក្សាសហព័ន្ធរុស្ស៊ីបានផ្តល់សច្ចាប័នលើកិច្ចព្រមព្រៀងនោះ។ ទីបំផុតនៅថ្ងៃទី ៩ ខែវិច្ឆិកា (ម៉ោងក្នុងតំបន់) ប្រធានាធិបតីពូទីនបានចុះហត្ថលេខា បោះត្រា និងអនុម័តកិច្ចព្រមព្រៀងជាផ្លូវការ។
“ការផ្តល់សច្ចាប័នលើកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយរវាងសហព័ន្ធរុស្ស៊ី និងសាធារណរដ្ឋប្រជាធិបតេយ្យប្រជាមានិតកូរ៉េ ដែលបានចុះហត្ថលេខានៅទីក្រុងព្យុងយ៉ាងនៅថ្ងៃទី 19 ខែមិថុនា ឆ្នាំ 2024” ឯកសារដែលចុះហត្ថលេខាដោយប្រធានាធិបតីរុស្ស៊ី អានកាលបរិច្ឆេទចុះហត្ថលេខាយ៉ាងច្បាស់នៅថ្ងៃទី 9 ខែវិច្ឆិកា ឆ្នាំ 2024 ។ សន្ធិសញ្ញានេះចូលជាធរមានជាផ្លូវការបន្ទាប់ពីទីក្រុងម៉ូស្គូ និងទីក្រុងព្យុងយ៉ាងផ្លាស់ប្តូរឯកសារផ្តល់សច្ចាប័ន។
ក្នុងអនុស្សរណៈនៃកិច្ចព្រមព្រៀង ប្រទេសទាំងពីរបានប្តេជ្ញារក្សា និងអភិវឌ្ឍន៍លើមូលដ្ឋានរយៈពេលវែង ដោយផ្អែកលើច្បាប់ជាតិ និងកាតព្វកិច្ចអន្តរជាតិ កសាងភាពជាដៃគូយុទ្ធសាស្ត្រគ្រប់ជ្រុងជ្រោយលើគោលការណ៍គោរពគ្នាទៅវិញទៅមកចំពោះអធិបតេយ្យភាព និងបូរណភាពទឹកដី ការមិនជ្រៀតជ្រែកក្នុងកិច្ចការផ្ទៃក្នុង សមភាពគ្នាទៅវិញទៅមក និងការអនុលោមតាមគោលការណ៍ផ្សេងទៀតនៃច្បាប់អន្តរជាតិស្តីពីទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសនានា។
ភាគីទាំងពីរក៏ស្វែងរកការបង្កើតស្ថិរភាពយុទ្ធសាស្ត្រសកល និងប្រព័ន្ធអន្តរជាតិពហុប៉ូលយុត្តិធម៌។
ក្នុងករណីមានការគំរាមកំហែងនៃការវាយប្រហារដោយប្រដាប់អាវុធប្រឆាំងនឹងភាគីណាមួយ ប្រសិនបើភាគីម្ខាងទៀតមានការស្នើសុំ ភាគីនេះនឹងបើកដំណើរការជាបន្ទាន់នូវបណ្តាញទ្វេភាគីសម្រាប់ការពិគ្រោះយោបល់ដើម្បីសម្របសម្រួល និងយល់ព្រមលើវិធានការជាក់ស្តែងដើម្បីគាំទ្រជំនួយទៅវិញទៅមកដើម្បីជួយលុបបំបាត់ការគំរាមកំហែង។
ទាំងនោះមានន័យថា កូរ៉េខាងជើង បញ្ជូនកងទ័ពទៅជួយរុស្ស៊ីគឺជារឿងស្របច្បាប់ ចំណែករុស្ស៊ីក៏ដូច្នោះដែរ បើកូរ៉េប្រឈមនឹងសង្គ្រាម រុស្ស៊ី និងបញ្ជូនទ័ពទៅជួយទីក្រុងព្យុងយ៉ាងវិញ៕ ដោយ៖ ធីរីណា