🔥Update! ករណីឆ្លងចរន្តអគ្គិសនីឆេះផ្ទះល្វែងលក់ដូរសម្ភារៈជ័រនៅផ្សារអន្តរជាតិបាវិត សរុបទឹកប្រាក់អស់ប្រហែល២ម៉ឺនដុល្លារ

ខេត្តស្វាយរៀង៖ យោងតាមសមត្ថកិច្ចមូលដ្ឋានកងរាជអាវុធហត្ថក្រុងបាវិតបានឱ្យដឹងនារសៀលថ្ងៃទី១០ខែវិច្ឆិកាឆ្នាំ២០២៤នេះថា ករណីឆ្លងចរន្តអគ្គិសនី ឆេះផ្ទះល្វែងលក់ដូរសម្ភារៈជ័រនៅផ្សារអន្តរជាតិបាវិត កាលពីយប់ ថ្ងៃទី៩ខែវិច្ឆិកាឆ្នាំ២០២៤ គឺសរុបការខូចខាតអស់ទឹកប្រាក់ប្រហែល២ម៉ឺនដុល្លារ ប៉ុន្តែមិនមានអ្នករងរបួសនោះទេ។

សមត្ថកិច្ចកងរាជអាវុធហត្ថក្រុងបន្តថាម្ចាស់ផ្ទះរងគ្រោះមានឈ្មោះ សៀង សុភារី ភេទស្រី អាយុ២៨ឆ្នាំ មុខរបរលក់គ្រឿងជ័រ ស្ថិតនៅផ្សារអន្តរជាតិ​ក្នុងភូមិ​បាវិតកណ្តាល​ សង្កាត់បាវិត​ ក្រុងបាវិត ខេត្តស្វាយរៀង។

ប្រភពបន្តថា បន្ទាប់ពីមានសេចក្ដីរាយការណ៍ថា មានករណីអគ្គិភ័យឆេះផ្ទះល្វែងនៅក្នុងផ្សារអន្តរជាតិបាវិតភ្លាម កម្លាំងកងរាជអាវុធហត្ថខេត្តស្វាយរៀង សហការជាមួយកម្លាំងមូលដ្ឋានកងរាជអាវុធហត្ថក្រុងបាវិតដឹកនាំដោយ​លោកវរសេនីយ៍ត្រី​ គ្រុយ​ សុខ​ឡេង មេបញ្ជាការមូលដ្ឋានកងរាជអាវុធហត្ថក្រុងបាវិត បានចុះអន្ដរាគមន៍ជួយពន្លត់ដោយក្នុងករណីនោះប្រើប្រាស់រថយន្ត​ពន្លត់​អគ្គិភ័យ​ចំនួន០៨រឿង (រថយន្តកងរាជអាវុធហត្ថខេត្តចំនួន០៣គ្រឿង, រថយន្ដមូលដ្ឋានកងរាជអាវុធហត្ថក្រុងបាវិតចំនួន០១គ្រឿង និងរថយន្តរបស់ស្នងការដ្ឋាននគរបាលខេត្តស្វាយរៀង ចំនួន០៤គ្រឿង ដោយមូលហេតុបណ្តាលមកពីការឆ្លងចរន្តអគ្គិសនី ៕

ដោយ៖ សុថាន