សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោកវរសេនីយ៍ឯក ស៉ឹម ពិសិដ្ឋ អធិការនគរបាលខណ្ឌទួលគោក បានឱ្យដឹងនៅព្រឹកថ្ងៃទី១២ ខែវិច្ឆិកា ឆ្នាំ២០២៤នេះថា៖ ទីតាំងក្លឹបយីហោ”ប៉ាវលីជីង” មួយកន្លែងដែលត្រូវតុលាការបិទសៀលឃ្លុំបេរ ស្ថិតនៅចំណុចដីឡូត៍លេខ៧៤ ផ្លូវលេខ៥៩៨ ក្រុមទី២១ ភូមិ៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ត្រូវបានក្រុមចោរមួយក្រុមមានគ្នាចំនួន ០៤នាក់បានធ្វេីសកម្មភាពគាស់លួចយកទ្រព្យសម្បត្តិ ប៉ុន្តែត្រូវបានកម្លាំងជំនាញ ចុះស្រាវជ្រាវរហូតឈានដល់ការបង្រ្កាប និងឃាត់ខ្លួនជាបន្តបន្ទាប់យកមកសាកសួរបញ្ចប់នីតិវិធី និងបានបង្ហាញមុខជាសាធារណៈ មុននិងបញ្ជូនខ្លួនទៅតុលាការ ដេីម្បីចាត់ការតាមច្បាប់។
លោកវរសេនីយ៍ឯក ស៉ឹម ពិសិដ្ឋ បានឱ្យដឹងទៀតថា ជាក់ស្ដែងកាលពីព្រលប់ថ្ងៃទី១១ ខែវិច្ឆិកា ឆ្នាំ២០២៤ វេលាម៉ោងប្រហែល ១៨ និង៣០នាទី កម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក បានធ្វើការឃាត់ខ្លួនជនសង្ស័យ០១នាក់ឈ្មោះ សេង ហួរ ភេទប្រុស អាយុ២៣ឆ្នាំ ជនជាតិខ្មែរ ពីបទលួចមានស្ថានទម្ងន់ទោសដោយសារការគាស់ទម្លុះទម្លាយ(គាស់ក្លឹបប៉ាវលីជីងតុលាការបិទសៀលឃ្លុំបេរគាស់យកសម្ភារ:) ប្រព្រឹត្តនៅចំណុចប៉ាវលីជីងក្លឹប ដែលមានទីតាំងដីឡូត៍លេខ៧៤ ផ្លូវលេខ៥៩៨ ក្រុមទី២១ ភូមិ៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ និងបន្តស្រាវជ្រាវឃាត់ខ្លួនជនសង្ស័យជាបក្ខពួក០៣នាក់ទៀត នៅចំណុចផ្លូវរថភ្លើង ក្រុមទី២៦ ភូមិ២ សង្កាត់ស្រះចក ខណ្ឌដូនពេញ រាជធានីភ្នំពេញ ។
ជនសង្ស័យទាំង៤នាក់នោះ រួមមាន៖ ទី១-ឈ្មោះ សេង ហួរ ភេទប្រុស អាយុ២៣ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់ផ្ទះជួល ផ្លូវរថភ្លើង សង្កាត់ស្រះចក ខណ្ឌដូនពេញ រាជធានីភ្នំពេញ ។ ទី២-ឈ្មោះ លន វលក្ខណ៍ ភេទប្រុស អាយុ២៦ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅផ្ទះជួល ផ្លូវរថភ្លើង ភូមិ១៧ សង្កាត់ស្រះចក ខណ្ឌដូនពេញ ។ ទី៣-ឈ្មោះ គុំ សុជាតិ ភេទប្រុស អាយុ៣៤ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅមិនពិតប្រាកដ ។ និងទី៤-ឈ្មោះ រ៉ាន់ រ៉ាឌីន ហៅ ត្រេន ភេទប្រុស អាយុ២៩ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅផ្ទះលេខ៩៧ ផ្លូវរថភ្លើង ក្រុមទី២៦ ភូមិ២ សង្កាត់ស្រះចក ខណ្ឌដូនពេញ រាជធានីភ្នំពេញ ។
ចំណែកវត្ថុតាងចាប់យកពាក់ព័ន្ធនិងបទល្មើសរួមមាន៖ ១ /ក្បាលម៉ាស៊ីនត្រជាក់ចំនួន០១ ,២/ ខ្សែភ្លើងមួយចំនួន ,៣/ DesK top ចំនួន០១ ,៤/ កន្ត្រៃសម្រាប់កាត់ដែកចំនួន០១ ,៥/ FM ម៉ៃក្រូហ្វូនធំម៉ាកSHVRE ចំនួន១៣គ្រឿង ,៦/ FM ម៉ៃក្រូហ្វូនតូចម៉ាក THUNDERSTONE ពណ៌ស ចំនួន២៤គ្រឿង ,៧/ដុំប៊្លូធូពណ៌ខ្មៅចំនួន១២គ្រឿង ,៨/ធុងប៉ាស់ម៉ាកJBLចំនួន០៨គ្រឿង , ៩/ដែកថ្នាំអំពៅសម្រាប់គាស់ចំនួន០១ (ចាប់យកពីឈ្មោះ សេង ហួរ ) ,១០/ស្រា០១ដប ម៉ាក DALMORE មានប្រអប់ពណ៍ខៀវ , ដាវកែច្នៃ១ដើម , កាំបិតបុ័ងតោមានរូបនាគមានស្រោមពណ៍សូកូឡា០១ , កន្រ្តៃសម្រាប់កាត់ដែក០១ , ឧបករណ៍កែច្នៃសម្រាប់ជក់គ្រឿងញៀន០១ និងកង់តួប្រុសពណ៍ខ្មៅ០១គ្រឿង (ចាប់យកពីឈ្មោះ រ៉ាន់ រ៉ាឌីន ហៅ ត្រេន ) ,១១/កង់តួប្រុស០១ (ចាប់យកពីឈ្មោះ លន វលក្ខណ៍ ) , ១២/ស្រាដបម៉ាក BLACK LABEL១កេស (ចាប់យកពីឈ្មោះ គុំ សុជាតិ ) ។
គួរបញ្ជាក់ថា ក្រោយប្រតិបត្តិការចប់កន្លែងកើតហេតុកម្លាំងជំនាញពិនិត្យឃើញរួមមាន៖ ស្នាមគាស់បន្ទប់បិទសៀលបិទឃ្លុំបេរ , ស្នាមគាស់ទូឌីសង់ទ័រភ្លើងក្នុងក្លឹប, ស្នាមគាស់កាត់ខ្សែភ្លើង និងតាមបន្ទប់បម្រើសេវាខារ៉ាអូខេ មានស្នាមរើកកាយខូចខាតស្ទើទាំងស្រុង ដោយឡែកទីតាំងខាងលើនេះ ដោយមាន
កិច្ចសម្របសម្រួលពីលោក ស៊ិន រក្សា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ អនុញ្ញាតិឲ្យក្រុមប្រតិបត្តិការចម្រុះយើងសម្រេចបិទសៀលឃ្លុំបេឡើងវិញ ។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅ អធិការដ្ឋាននគរបាលខណ្ឌទួលគោក ដើម្បីសាកសួរ និងចាត់ការបន្តតាមនីតិវិធី៕
ដោយ៖ តារា
