សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បើករថយន្តដឹកឥដ្ឋ ដាច់ហ្វ្រាំង ជ្រុលចង្កូតបុករះរថយន្តឡិចស៊ីស ម៉ូតូ និងឡំប្រឺតារបស់ប្រជាពលរដ្ឋដែលកំពុងជិះតាមដងផ្លូវ បណ្តាលឲ្យរងការខូចខាតយ៉ាងដំណំ និងរងរបួសស្រាល២នាក់ ។ ហេតុការណ៍នេះបង្កឡេីងកាលពីវេលាម៉ោង ១០និង២០នាទីព្រឹក ថ្ងៃទី១២ ខែវិច្ឆិកា ឆ្នាំ ២០២៤ មុខសាលាបឋមសិក្សាភ្នំពេញថ្មី តាមបណ្ដោយផ្លូវហាណូយ សង្កាត់ភ្នំពេញថ្មី ខណ្ឌសែនសុខ។
បេីតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញ បុរសម្នាក់បើកបររថយន្តដឹកឥដ្ឋ មួយគ្រឿង ក្បាលពណ៌ស ពាក់ផ្លាកលេខតាកែវ 2A .4074 ធ្វើដំណើរទិសដៅពីជើងមកត្បូង ក្នុងល្បឿនមធ្យម លុះធ្វើដំណើរដល់ត្រង់ចំណុចមុខសាលាបឋមសិក្សាភ្នំពេញថ្មី ស្រាប់តែរថយន្តដឹកឥដ្ឋខាងលើបានដាច់ហ្វ្រាំងបួងចង្កូតចូលមកផ្លូវម្ខាងទៀតមកខាងឆ្វេងដៃ បណ្ដាលឲ្យបុករះចំរថយន្តឡិចស៊ីស RX300មួយគ្រឿងពណ៌ទឹកប្រាក់ពាក់ផ្លាកលេខ សៀមរាប 2C.1906 ម៉ូតូ ហុងដាសង់ឌ្រីមមួយគ្រឿងស៊េរី២០១៦ពណ៌ខ្មៅពាក់ផ្លាកលេខ ភ្នំពេញ 1GB. 2042 និងឡំប្រឺតាមួយគ្រឿងទៀត ពណ៌ស ពាក់ផ្លាកលេខ1HM. 1835 របស់ប្រជាពលរដ្ឋដែលកំពុងជិះតាមដងផ្លូវសុខៗ បណ្តាលឲ្យរងការខូចខាតយ៉ាងដំណំ និងបណ្តាលឲ្យភាគីខាងម៉ូតូហុងដាសង់ឌ្រីមនិងភាគីខាងម៉ូតូកង់បីឥណ្ឌារងរបួសស្រាល២ នាក់ ។
ក្រោយកើតហេតុ សមត្ថកិច្ចជំនាញ បានចុះមកវាស់វែងយករថយន្តម៉ូតូនិងឡំប្រឺតា ទៅរក្សាទុកនៅការិយាល័យនគរបាលចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នាតាមច្បាប់នាពេលក្រោយ ៕
ដោយ ៖ ភារ៉ា ដង្កោ
