សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានបើករថយន្តដឹកភ្ញៀវជាជនបរទេសម្នាក់សុខៗស្រាប់តែមិនស្រួលខ្លួនងោកមួយភាំងក៏ជាន់ហ្គែហោះរំលងផ្លូវជ្រុលទៅបុករបងព័ទ្ធដីជុំវិញឃ្លាំងមួយកន្លែងពេញទំហឹងបណ្តាលឲ្យគាបជាប់ក្នុងរថយន្តរងរបួសត្រូវបានក្រុមគ្រួសារដឹកតាមកង់បីបញ្ជូនទៅមន្ទីរពេទ្យភ្លាមៗ។
ហេតុការណ៍ភ្ញាក់ផ្អើលនេះដែរបានកើតឡើងកាលពីយប់ ថ្ងៃទី២ខែធ្នូ ឆ្នាំ២០២៤ ស្ថិតនៅតាមបណ្តោយផ្លូវទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តម៉ាកtoyota prius ពណ៌ទឹកប្រាក់មួយគ្រឿងពាក់ស្លាកលេខភ្នំពេ2BW-3864 បើកបរដោយបុរសម្នាក់ រួមដំណើរជាមួយបុរសជាភ្ញៀវម្នាក់ទៀតជាជនបរទេសធ្វើដំណើរតាមបណ្ដោយផ្លូវបេតុងក្នុងទិសដៅពីកើតមកលិចក្នុងល្បឿនលឿនមធ្យមខណៈពេលបើកមកដល់ចំណុចកើតហេតុទំនងជាមិនស្រួលខ្លួនស្រាប់តែងោកមួយភាំងជាន់ហ្គែជ្រុលហោះរំលងផ្លូវទៅបុករបងព័ទ្ធជុំវិញឃ្លាំងមួយកន្លែងយ៉ាងពេញទំហឹងបណ្តាលឲ្យអ្នកបើករថយន្តគាបជាប់ក្នុងរថយន្តត្រូវបានប្រជាពលរដ្ឋក្បែរខាងនាំគ្នាជួយវាយបំបែកកញ្ចក់យកអ្នកបើកបរចេញមកក្រៅ ។
បន្ទាប់ពីកើតហេតុសមត្ថកិច្ចមូលដ្ឋានសហការជាមួយនឹងសមត្ថកិច្ចជំនាញបានចុះមកស្ទូចយករថយន្តទៅរក្សាទុកជាបណ្ដោះអាសន្ន ដើម្បីឲ្យជនរងគ្រោះមកដោះស្រាយជាមួយភាគីម្ចាស់របង នៅពេលក្រោយ៕
ដោយ៖ ជ្រោយពេជ្រ
