សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាលកម្ពុជា នៅព្រឹកថ្ងៃសៅរ៍ទី២៨ ខែធ្នូ ឆ្នាំ២០២៤នេះ បានឱ្យដឹងថា ប្រទេសចិនកំពុងឆ្លេីយតបនឹងមេរោគ Humanmetapneumovirus(hMPV) ខណៈប្រទេសកម្ពុជាយេីង ក៏ធ្លាប់រកឃេីញមេរោគនេះដែរលេីកុមារ។
នាយកដ្ឋានប្រយុទ្ធនឹងជំងឺឆ្លង បានបន្តថា ប្រទេសចិនបាននិងកំពុងប្រយុទ្ធប្រឆាំងនឹងការផ្ទុះឡើងនៃមេរោគ human metapneumovirus (HMPV) ដែលបមានរោគសញ្ញាស្រដៀងទៅនឹងជំងឺផ្តាសាយធំ និង COVID-19 ។
វេជ្ជបណ្ឌិត Chen Chih-jung នៃមន្ទីរពេទ្យ Linkou Chang Gung Memorial Hospital បាននិយាយនៅក្នុងបទសម្ភាសន៍មួយកាលពីថ្ងៃព្រហស្បតិ៍ថា hMPV គឺស្រដៀងទៅនឹងមេរោគផ្លូវដង្ហើម RSV (ជាមេរោគបង្កជំងឺផ្លូវដង្ហេីមដែរ) ដែលភាគច្រើនឆ្លងដល់កុមារអាយុក្រោម 2 ឆ្នាំ ខណៈដែល hMPV មាននិន្នាការឆ្លងកុមារធំ។ លោកបានពន្យល់ថា កុមារខ្លះដែលឆ្លងមេរោគអាចតម្រូវឱ្យចូលមន្ទីរពេទ្យ ប៉ុន្តែជំងឺនេះមិនសូវធ្ងន់ធ្ងរដូចជំងឺគ្រុនផ្តាសាយធំទេ ហេីយកុមារភាគច្រើនបានជាសះស្បើយឡើងវិញ។
សូមបញ្ជាក់ថា ក្នុងរដូវរងារនេះ អ្នកមានរោគផ្តាសាយ និងរលាកផ្លូវដង្ហេីម គឺភាគច្រេីនបង្កឡេីងដោយមេរោគផ្តាសាយធំ Influenza ។
ដេីម្បីបង្ការចម្លងមេរោគផ្តាសាយ និងមេរោគផ្លូវដង្ហេីមផ្សេងៗ សូមពាក់ម៉ាស់ រក្សាគម្លាត ឧស្សាហ៏លាងដៃញឹកញប់ ចៀសវាងកន្លែងមានមនុស្សច្រើន ដើម្បីកាត់បន្ថយការឆ្លងរាលដាល ។ ព័ត៌មានបន្ថែមសូមទាក់ទងលេខទូរស័ព្ទ ១១៥៕
ដោយ៖ តារា
