សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តកាមរីមួយគ្រឿង បើកបរដោយបុរសម្នាក់បានបោះពួយក្នុងល្បឿនលឿនជ្រុលចង្កូតទៅបុករះសួនច្បារពុះចែកទ្រូងផ្លូវបណ្តាលឲ្យខូចខាតទាំងរថយន្តរួមទាំងសួនច្បារពុះចែកទ្រូងផ្លូវ និងបង្គោលភ្លើងផងដែរ។
ហេតុការណ៍នេះបានកើតឡើងកាលពីវេលាម៉ោង៩និង៣០នាទីយប់ ថ្ងៃទី៣០ ខែធ្នូ ឆ្នាំ២០២៤។
ទីតាំងកើតហេតុ ស្ថិតនៅតាមបណ្តោយផ្លូវជាតិលេខ៦ ក្នុងសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្តកាមរីមួយគ្រឿងពណ៌ស្ករ ពាក់ស្លាកលេខ ភ្នំពេញ2BV-8464 បើកបរដោយបុរសម្នាក់ បានធ្វើដំណើរតាមបណ្តោយផ្លូវជាតិលេខ៦ក្នុងល្បឿនលឿនក្នុងទិសដៅពីត្បូងទៅជើង ។ ប្រភពបន្តថា លុះមកដល់ចំណុចកើតហេតុ គេបានឃើញរថយន្តខាងលើរេចង្កូតទៅបុកខឿនសួនច្បារពុះចែកទ្រូងផ្លូវ។ បន្ទាប់មកក៏បុករះសួនច្បារបណ្តាលឲ្យខូចខាតបង្គោលស្លាកសញ្ញាចរាចរណ៍មួយដើម ព្រមទាំងបង្គោលភ្លើងបំភ្លឺផ្លូវ១ដើមថែមទៀតផង ។
ហេតុការណ៍នេះមិនបានបង្កអោយមានមនុស្សរងរបួសនោះទេ គឺខូចខាតតែរថយន្តនិងទ្រព្យសម្បត្ថិរដ្ឋតែប៉ុណ្ណោះ ។ចំណែកបង្គោលភ្លើងត្រូវបានមន្ត្រីជំនាញផ្នែកអគ្គិសនីចុះមកធ្វើការជួសជុលនិងដំឡើងឡើងវិញ ដើម្បីសម្រួលការធ្វើដំណើរពេលយប់ជូនបងប្អូនប្រជាពលរដ្ឋផងដែរ។
ក្រោយពេលកើតហេតុ សមត្ថកិច្ចមូលដ្ឋានបានទាក់ទងទៅកាន់សមត្ថកិច្ចជំនាញចរាចរណ៍ដើម្បីចុះមកធ្វើការវាស់វែង និងស្ទួចយករថយន្តខាងលើទៅរក្សាទុកនៅផ្នែកនគរបាលចរាចរណ៍នៃអធិការដ្ឋាននគរបាលខណ្ឌជ្រោយចង្វារង់ចាំម្ចាស់រថយន្តចូលខ្លួនដោះស្រាយតាមនីតិវិធីច្បាប់នៅពេលក្រោយ៕
ដោយ៖ សុខាសែនជ័យ
