សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ តារាចំរៀងលំដាប់ពិភពលោករបស់កម្ពុជា លោក(វណ្ណដា) នៅយប់ថ្ងៃទី៤ ខែមករា ឆ្នាំ២០២៥ បានបង្ហោះយ៉ាងដូច្នេះថា ៖ ខ្ញុំចង់ហៅអ្នកគាំទ្រឱ្យឡើងមកផលិតចម្រៀងជាមួយខ្ញុំលើឆាកភ្លាមៗដែរ ។
លោក(វណ្ណដា) បង្ហោះបែបនេះដោយលោកបញ្ជាក់ថា ៖ ខ្ញុំទទួលបានសំណួរជាច្រើនអំពី Listening Party ខ្ញុំចង់បន្ថែមខ្លះៗទៀតដើម្បីអ្នកគាំទ្រខ្ញុំកាន់តែច្បាស់ ព្រោះខ្ញុំដឹងថានេះគឺថ្មីសម្រាប់ទាំងអស់គ្នា ហើយនឹងក្លាយជាបទពិសោធមួយពិសេសសម្រាប់អ្នកគាំទ្រនិងខ្ញុំដូចគ្នា។
ខ្ញុំមានជិត ៤០ បទ នឹងត្រៀមចាក់នៅ Listening Party ទាំង ២ ថ្ងៃ គឺជាបទខ្ញុំបានខិតខំធ្វើជាបន្តបន្ទាប់ក្នុងរយៈពេល ៧ឆ្នាំដែលខ្ញុំបានប្រឡូកក្នុងវិស័យតន្ត្រីនេះ បទខ្លះក៏ចាស់ឆ្នាំ បទខ្លះក៏ខ្ញុំធ្វើឡើងនៅពេលដែលខ្ញុំបានរៀនពីអ្វីថ្មីៗ បទខ្លះជាបទដែលខ្ញុំពេញចិត្តខ្លាំងតែមិនទាន់មានគម្រោងចេញជាផ្លូវការ បទខ្លះក៏មិនមានគម្រោងនឹងចេញ តែក៏ចង់ចាក់ស្តាប់ជាមួយអ្នកគាំទ្រដើម្បីជាកាដូមួយដើមឆ្នាំមុននឹងយើងបន្តដំណើរតន្ត្រីក្នុងឆ្នាំនេះទៀតជាមួយគ្នា។
Listening Party មិនមែនត្រឹមជាការមកអង្គុយ ឬឈរស្តាប់ គឺជាពេលវេលាសំខាន់មួយដែលខ្ញុំ និងអ្នកគាំទ្រអាចជួបសំណេះសំណាលគ្នា ស្តាប់ចម្រៀង ហើយបង្ហាញអារម្មណ៍ទាំងអស់បានជាមួយគ្នា មានយំ សើចសប្បាយ និងរាំលេងជុំគ្នាជាដើម។ បន្ទាប់មកអ្នកទាំងអស់គ្នាអាចជួយខ្ញុំជ្រើសរើសបទណាដែលចូលចិត្តសម្រាប់ដាក់ទៅចូលអាល់ប៊ុមចំនួនខ្ទង់ ២០ បទ។
ទាំងអស់គ្នាក៏នឹងក្លាយជាផ្នែកមួយនៃអាល់ប៊ុមរបស់ខ្ញុំ ដោយខ្ញុំនឹងថតយកសំឡេងរបស់អ្នកចូលរួមដើម្បីយកទៅដាក់ផ្នែកណាមួយនៃចម្រៀង ហើយបើសិនជាអាច ខ្ញុំចង់ហៅអ្នកគាំទ្រឱ្យឡើងមកផលិតចម្រៀងជាមួយខ្ញុំលើឆាកភ្លាមៗដែរ។
ជាចុងក្រោយ អរគុណដែលបានគាំទ្រខ្ញុំគ្រប់ជំហានតាំងពីឈានចូលវិស័យសិល្បៈដំបូង ហើយឥឡូវនេះជាពេលដែលខ្ញុំតបស្នងអ្នកទាំងអស់គ្នាវិញនូវបទពិសោធមួយថ្មីនៅឆ្នាំនេះ។ ខ្ញុំសង្ឃឹមថាយើងអាចមកបង្កើតអនុស្សាវរីយថ្មីមួយជាមួយគ្នា 🫶🏼 See y’all at my listening party on 24th & 25th! ៕
ដោយ ៖ សិលា
