សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ ៖ ដើម្បីអបអរសាទរខួបលើកទី៤៦ នៃទិវាជ័យជម្នះ ៧ មករា ១៩៧៩ – ៧ មករា ២០២៥ រដ្ឋបាលខេត្តព្រះវិហារ បានរៀបចំពិធីចែកវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋ សរុបចំនួន ១,០៤៦ក្បាលដី លើផ្ទៃដី ទំហំជាង ២៥៧ហិកតា ជូនប្រជាពលរដ្ឋចំនួន ៨៦៩គ្រួសារ ស្ថិតនៅក្នុងភូមិភារកិច្ច(តំបន់កូនភ្នំ) សង្កាត់ប៉ាលហាល ក្រុងព្រះវិហារ ខេត្តព្រះវិហារ។ នេះជាការលើកឡើងពីលោក គីម រីទ្ធី អភិបាល នៃគណៈអភិបាលខេត្តព្រះវិហារ នៅព្រលប់ថ្ងៃទី៧ ខែមករា ឆ្នាំ២០២៥។
លោកអភិបាលខេត្តព្រះវិហារ បន្តថា ៖ កិច្ចការចែកវិញ្ញាបនបត្រនេះ គឺជាការបញ្ជាក់ពីការទទួលសិទ្ធិជាម្ចាស់អចលនវត្ថុ និងជាការបង្ហាញពីការចាប់អារម្មណ៍របស់រាជរដ្ឋាភិបាលកម្ពុជាដែលមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដាក់ចេញនូវយុទ្ធសាស្ត្របញ្ចកោណដំណាក់កាលទី១ គឺផ្តោតទៅលើការកែប្រែ និងបង្កើតមូលដ្ឋានសម្រាប់ការអភិវឌ្ឍន៍ប្រទេសជាតិ ក្នុងការការពារសិទ្ធិផ្ទះសម្បែង និងដីធ្លីរបស់ប្រជាពលរដ្ឋ។
លោក គីម រីទ្ធី អភិបាល នៃគណៈអភិបាលខេត្តព្រះវិហារ បញ្ជាក់ថា ៖ ការចែកវិញ្ញាបនបត្រអចលនទ្រព្យមានសារៈសំខាន់ក្នុងការធានាសិទ្ធិជាម្ចាស់អចលនវត្ថុតាមច្បាប់។ វាជាការចូលរួមដ៏សំខាន់ក្នុងការចងសាមគ្គីភាព និងលើកទឹកចិត្តឲ្យប្រជាពលរដ្ឋបន្តការប្រើប្រាស់ដីធ្លីតាមគោលការណ៍ច្បាប់ ដើម្បីរីកចម្រើនជាអនាគត ៕
ដោយ ៖ សិលា
