លួចបានម្តងញ៉ាម ទៅម្តងទៀតត្រូវសមត្ថកិច្ចឃាត់ខ្លួនបានពីរនាក់ រត់ប្រាស់អាយូសម្នាក់

ភ្នំពេញៈ ជនសង្ស័យ៣នាក់ ដែលធ្លាប់ធ្វើសកម្មភាពលួចសម្ភារក្នុងរោងចក្រ សិុន ជិធានបានសម្រេចម្តង កាលពីប៉ុន្មានខែមុន រហូតមកដល់រសៀលថ្ងៃទី២៨ ខែសីហា ឆ្នាំ២០១៦ ពួកគេបាននាំគ្នាមកលួចសម្ភារក្នុងរោងចក្រម្តងទៀត ប៉ុន្តែជាថ្ងៃស៊យរបស់ពួកគេ ក៏លួចមិនបានសម្រេច ដោយសារសន្តិសុខយាមរោងចក្របានឃើញពួកគេទាន់រួ ចរាយការណ៍មកសមត្ថកិច្ចនគរបាលប៉ុស្តិ៍ចុះអន្តរាគមន៍ឃាត់ខ្លួនពួកគេបាន២នាក់ និងម្នាក់ទៀតបានជិះម៉ូតូគេចខ្លួនបាត់ស្រមោល ។

សមត្ថកិច្ចបានអោយដឹងថា ការឃាត់ខ្លួននេះ ធ្វើឡើងនៅវេលាម៉ោង១និង២០នាទីរសៀល ថ្ងៃទី២៨ ខែសីហា ឆ្នាំ២០១៦ ស្ថិតនៅក្នុងរោងចក្រ សិុនជិធាន ភមិកណ្តាល សង្កាត់រលួស  ខណ្ឌដង្កោ រាជធានីភ្នំពេញ  ។ សមត្ថកិច្ចបន្តថា ជនសង្ស័យពីរនាក់ ដែលឃាត់ខ្លួនខាងលើមានទី១ ឈ្មោះ ឡោ សង្ហា ភេទប្រុស អាយុ ១៨ឆ្នាំ មានមុខរបរជាកម្មករកាត់ដេរ ទី២ ឈ្មោះ ឈិន សុផៃ ភេទប្រុស អាយុ២៣ឆ្នាំ មុខរបរបុគ្គលិកអង្គការ ហើយអ្នកទាំងពីរមានស្រុកកំណើតនៅ ភូមិឈើនាង ឃុំគោកគ្រប ស្រុកកណ្តាលស្ទឹង ខេត្តកណ្តាល  ចំណែកបក្ខពួកជនសង្ស័យម្នាក់ទៀត ដែលរត់គេចខ្លួនបាត់នោះ ឈ្មោះ បូរាណ  ហើយតំណាងរោងចក្រ សិុនជិធាន ដែលមកដាក់ពាក្យប្តឹងឈ្មោះ ផាន វ៉ានផៃ ភេទប្រុស អាយុ២៦ឆ្នាំ ជាបុគ្គលិករដ្ឋបាលក្នុងរោងចក្រ សិុនជិធាន  ។

សមត្ថកិច្ចបានបន្តថា តាមចម្លើយសារភាពរបស់ជនសង្ស័យគឺដំបូង ពួកគេបានជិះម៉ូតូមួយគ្រឿងម៉ាក វីវ៉ា ភ្នំពេញ 1B 7864 ដឹកគ្នាមកឈប់នៅដីឡូត៍មួយកន្លែង ចម្ងាយពីរោងចក្រជាង២០០ម៉ែត្រ រួចពួកគេទុកម៉ូតួចោល ហើយដើរទៅរោងចក្ររៀបចំចងខ្សែលើដើមឈើជាប់រោងចក្រ ដើម្បីតោងឡើងចូលលួចសម្ភារក្នុងរោងចក្រ ប៉ុន្តែពេលនោះសន្តិសុខដែលយាមនៅមុខរោងចក្របានក្រឡេកឃើញរួចស្រែក និងទូរស័ព្ទហៅសមត្ថកិច្ចនគរបាលប៉ុស្តិ៍រលួស ឲ្យជួយអន្តរាគមន៍ ឃាត់ខ្លួនក្រុមចោរ ភ្លាមៗនោះកម្លាំងចុះមកដល់និងឡោមព័ទ្ធចាប់ជនសង្ស័យបានពីរនាក់ខាងលើ និងដកហូតវត្ថុតាំងមួយចំនួនផងដែល រីឯបក្ខពួកចោរម្នាក់ទៀត បានជិះម៉ូតូគេចខ្លួនបាត់ស្រមោល  ។

ក្រោយពីសួរនាំជុំវិញករណីខាងលើនេះ សមត្ថកិច្ចនៃអធិការដ្ឋាននគរបាលខណ្ឌដង្កោបានសន្និដ្ឋានថា ជនសង្ស័យពិតជាបានធ្វើសកម្មភាពលួចសម្ភារក្នុងរោងចក្រ  សិុនជិធាន  ពិតប្រាកដមែន ដូច្នេះសមត្ថកិច្ចបានកសាងសំណុំរឿងត្រៀមបញ្ជូនខ្លួន ជនសង្ស័យទាំងពីរនាក់ ទៅសាលាដំបូងរាជធានីភ្នំពេញផ្តន្ទាទោសតាមនីតិវិធច្បាប់ ៕ ជីម ភារ៉ា ដង្កោ