សារព័ត៌មាន នគរវត្ត តែងតែនាំមុខគេជានិច្ច
កំពូលតារាបាល់ទាត់ Cristiano Ronaldo និងមិត្តស្រីរបស់គាត់ Georgina Rodríguez បានជួលអង្គរក្សបន្ថែម ហើយបានផ្លាស់ទៅផ្ទះថ្មី បន្ទាប់ពីទទួលបានការគម្រាមកំហែងជាបន្តបន្ទាប់ ដែលជំរុញឱ្យមានការអន្តរាគមន៍ពីប៉ូលិស ដើម្បីធានាសុវត្ថិភាពគ្រួសាររបស់ពួកគេ។
ចាប់តាំងពីផ្លាស់ទៅ Riyadh ប្រទេសអារ៉ាប៊ីសាអូឌីត Ronaldo និង Georgina បានរក្សាជីវិតធម្មតា។ ទោះបីជាយ៉ាងណាក៏ដោយ ប្រព័ន្ធផ្សព្វផ្សាយព័រទុយហ្គាល់ និងអេស្ប៉ាញបានរាយការណ៍ថា ថ្មីៗនេះ ពួកគេបានទទួលសារប្រកាសអាសន្នជាមួយនឹងការគំរាមកំហែងជាក់លាក់ និងធ្ងន់ធ្ងរ ដែលរំខានដល់ជីវិតប្តីប្រពន្ធ។ ប្រភពបញ្ជាក់ថា គ្រួសាររបស់ Ronaldo បានពង្រឹងវិធានការសន្តិសុខនៅឯគេហដ្ឋានរបស់ពួកគេ ដោយជួលអង្គរក្សថ្មីបួននាក់ និងបុគ្គលិកសន្តិសុខបន្ថែម 2 នាក់ នេះបើតាម EDATV រាយការណ៍។ ពួកគេក៏បានផ្លាស់ប្តូរទីលំនៅទៅកាន់ផ្ទះដែលមានសុវត្ថិភាពជាងមុនក្នុងទីក្រុង Riyadh ដែលបំពាក់ដោយប្រព័ន្ធឃ្លាំមើលដ៏ទំនើប។
ជីវិតប្រចាំថ្ងៃរបស់ Georgina ត្រូវបានផ្លាស់ប្តូរទាំងស្រុង ព្រោះឥឡូវនេះនាងកំណត់ការបង្ហាញខ្លួនជាសាធារណៈ ហើយតែងតែអមដោយសន្តិសុខ។ ខ្សែប្រយុទ្ធជើងចាស់រូបនេះក៏មានការប្រុងប្រយ័ត្នខ្ពស់ពេលចេញទៅក្រៅដែរ ដោយតែងមានអង្គរក្សនៅជាមួយ ទោះក្នុងព្រឹត្តិការណ៍កីឡាក៏ដោយ។ E-Notícies បានរាយការណ៍ថា ប៉ូលិសអារ៉ាប៊ីសាអូឌីតកំពុងស៊ើបអង្កេតប្រភពដើមនៃការគំរាមកំហែងទាំងនេះ ។
ក្លឹប Al Nassr របស់ Ronaldo ក៏កំពុងជួយគាត់ដោយផ្តល់ធនធានដើម្បីការពារគាត់ និងគ្រួសាររបស់គាត់។
គូស្នេហ៍មួយគូនេះក៏មិនចែករំលែករូបភាពកូនៗរបស់ពួកគេនៅលើប្រព័ន្ធផ្សព្វផ្សាយសង្គម ដោយសារតែការភ័យខ្លាចថាពួកគេអាចជាគោលដៅនៃការគំរាមកំហែង។ ក្នុងអំឡុងពេលប្រារព្ធពិធីខួបកំណើតរបស់ Ronaldo កាលពីដើមខែកុម្ភៈ Georgina បានប្រើសញ្ញាបេះដូងដើម្បីបិទមុខកូនៗរបស់ពួកគេ លើកលែងតែកូនប្រុសច្បង Cristiano Jr.។
ទោះបីជាមានស្ថានភាពយ៉ាងណាក៏ដោយ ប្រភពនិយាយថា Ronaldo នៅតែផ្តោតលើអាជីពកីឡារបស់ខ្លួន។ Georgina ដែលជាតារាបង្ហាញម៉ូត បន្តការងាររបស់នាង ប៉ុន្តែជៀសវាងការនិយាយជាសាធារណៈអំពីបញ្ហានេះ៕
ដោយ៖ ភារៈ
