ផ្អើលអ្នកដំណើរទាំងព្រឹក!ឆេះរថយន្តម៉ាកហុីយ៉ាន់ដាយ atoz មួយគ្រឿងយ៉ាងសន្ធោសន្ធៅ សង្ស័យឆ្លងចរន្តភ្លើង នៅស្រុកកំពង់រោទិ៍

ខេត្តស្វាយរៀង​៖ ផ្អើលអ្នកធ្វើដំណើរនិងប្រជាពលរដ្ឋទាំងព្រឹក ខណ:មាន រថយន្តម៉ាកហុីយ៉ាន់ដាយ atoz មួយគ្រឿង ត្រូវបានភ្លើងឆាបឆេះយ៉ាង​សន្ធោសន្ធៅ​ ដោយសង្ស័យ​ថាឆ្លងចរន្តភ្លើងតាមដងផ្លូវជាតិលេខ ៣១៤D ដោយសមត្ថកិច្ច បានយករថយន្តពន្លត់អគ្គិភ័យមកជួយបាញ់ទឹកពន្លត់ ប៉ុន្ដែគួរឱ្យស្ដាយ រថយន្តនេះ ត្រូវបានភ្លើងឆេះសល់តែគ្រោងឆ្អឹងបាត់ទៅហើយ។​

ហេតុការណ៍ខាងលើនេះបានកើតឡើងកាលពីវេលាម៉ោង៩:៣៥នាទី ព្រឹកថ្ងៃទី២០ ខែមីនា ឆ្នាំ២០២៥ នៅលើផ្លូវជាតិលេខ៣១៤D ស្ថិតក្នុងភូមិ ត្រពាំង​រុន  ឃុំ ព្រះពន្លា  ស្រុក កំពង់រោទិ៍ ខេត្ត​ស្វាយរៀង​។​

បើតាមសាក្សី បានឃើញហេតុការណ៍នេះ បានឱ្យដឹងថា នៅមុនពេលកើតហេតុគេឃើញមានរថយន្តមួយគ្រឿងម៉ាក ហុីយ៉ាន់ដាយ​ atoz ពណ៌ លឿង ពាក់ស្លាកលេខ ភ្នំពេញ 2N-4813 ធ្វើដំណើរ​ពីទិសខាងជើងទៅទិសខាងត្បូង។​

ប្រភព បានបន្តទៀតថា លុះមកដល់ចំណុចកើតហេតុខាងលើស្រាប់តែឃើញមានមនុស្សចុះចេញពីរថយន្តដោយរថយន្តមានហុយផ្សែងចេញអណ្តាតភ្លើងហើយត្រូវបានប្រជាពលរដ្ឋក្នុងភូមិចេញមកជួយនិងរាយការណ៍មកសមត្ថកិច្ចដើម្បីសុំរថយន្តពន្លត់អគ្គិភ័យមកជួយបាញ់ទឹកពន្លត់តែដោយភ្លើងឆាបឆេលឿនពេកបណ្តាលឱ្យរថយន្តឆេះអស់សល់តែគ្រោងឆ្អឹង។​

ចំណែក​ម្ចាស់រថយន្តមិនត្រូវបានស្គាល់​អត្តសញ្ញាណ ​ខណៈបានត្រឹម​តែឈរមើលរថយន្តដែលត្រូវភ្លើងឆាបឆេះយ៉ាងខ្លាំង និងក្រោយមកសមត្ថកិច្ច និងពលរដ្ឋបាននាំគ្នាជួយលើករថយន្តចេញពីកន្លែងកើតហេតុដើម្បីកុំឱ្យមានការកកស្ទះចរាចរណ៍ដោយករណីនេះមិនបណ្ដាលឱ្យមនុស្សរងគ្រោះថ្នាក់នោះទេ៕

ដោយ៖ សុថាន