សារព័ត៌មាន នគរវត្ត តែងតែនាំមុខគេជានិច្ច
តារាវាយកូនហ្គោលដ៏ល្បី Tiger Woods បានធ្វើឱ្យមានការចាប់អារម្មណ៍យ៉ាងខ្លាំដោយបានបង្ហាញអំពីទំនាក់ទំនងស្នេហាជាមួយអតីតកូនប្រសារបស់ប្រធានាធិបតីត្រាំជាសាធារណៈ។
លោកTiger Woods និងនាង Vanessa Trump បានចេញមុខជាសាធារណៈជាមួយនឹងទំនាក់ទំនងរបស់ពួកគេដោយបង្ហោះរូបភាពពីរនាក់នៅលើបណ្តាញសង្គមដោយប្រកាសពី ស្នេហាពិតប្រាកដរបស់ពួកគេ។
រឿងនេះកើតឡើង ១០ ថ្ងៃបន្ទាប់ពី DailyMail.com បានចេញផ្សាយព័ត៌មានផ្តាច់មុខដែលថាកីឡាករវាយកូនហ្គោលកំពុងណាត់ជួបស្នេហាជាមួយអតីតភរិយារបស់លោក Donald Trump Jrដែលជាកូនប្រុសច្បងរបស់លោក ដូណាល់ត្រាំ។
ទន្ទឹមនឹងរូបភាពពីរសន្លឹករបស់គូស្នេហ៍ដែលស្រលាញ់គ្នានេះ លោក Woods បានសរសេរកាលពីយប់ថ្ងៃអាទិត្យថា “ស្នេហាពិតបានកើតឡើង ហើយជីវិតខ្ញុំគ្មានអ្វីប្រសើរជាងមានអ្នកនៅក្បែរខ្ញុំ។”
ក្នុងចំណោមមនុស្សដំបូងគេដែលផ្តល់ការអបអរសាទរគឺ Ivanka Trump អតីតបងថ្លៃស្រីរបស់ Vanessa។ នាងបានបញ្ចេញមតិលើការបង្ហោះថា “រីករាយណាស់សម្រាប់អ្នកទាំងពីរ” ខណៈបន្ថែមរូប Emoji ជាច្រើនជាមួយបេះដូងស្នេហា។
DailyMail.com បានបញ្ជាក់ជាមួយនឹងប្រភពចំនួនបួនថា កីឡាករWood អាយុ ៤៩ឆ្នាំ និង Vanessa អាយុ ៤៧ឆ្នាំ ដែលអ្នកទាំងពីររស់នៅក្នុងរដ្ឋ Florida បានរួមរស់ជាមួយគ្នាតាំងពីថ្ងៃបុណ្យ Thanksgiving មកម្លេះ ។
Vanessa បានរៀបការជាមួយកូនច្បងរបស់ប្រធានាធិបតីអាមេរិក ត្រាំ នៅឆ្នាំ ២០០៥ មុនពេលពួកគេទាំងពីរបានបែកគ្នា ១៣ឆ្នាំក្រោយមកនិងមានកូនចំនួន៥នាក់៕
ដោយ៖ ភារៈ
