សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ កាលពីថ្ងៃទី២៥ ខែមីនា ឆ្នាំ ២០២៥ ស្ថិតនៅភូមិកូនដំរី សង្កាត់សំរោង ក្រុងសំរោង ខេត្តឧត្តរមានជ័យ កើតមានករណីអំពើហិង្សាក្នុងគ្រួសារមួយកើយឡើង ដោយបុរសជាប្តី ខឹងប្រពន្ធទៅដេកផ្ទះអ្នកជិតខាងក៏បានដុតផ្ទះឆេះហ្មត់ ហើយសមត្ថកិច្ចបានធ្វើការឃាត់ខ្លួនជនបង្ក យកទៅចាត់ការតាមផ្លូវច្បាប់ ។
សមត្ថកិច្ចក្រុងសំរោងបានឲ្យដឹងថា ជនសង្ស័យជាប្តី ឈ្មោះ ភាន់ ជា អាយុ៤២ឆ្នាំនិងប្រពន្ធឈ្មោះ វី ស៊ីណែត អាយុ៣៣ឆ្នាំ មានទីលំនៅភូមិ សង្កាត់ កើតហេតុខាងលើ ។
តាមប្រភពព័ត៌មានឲ្យដឹងថា នៅវេលាព្រលប់ថ្ងៃទី២៤ ខែមីនា ឆ្នាំ២០២៥ ប្តីប្រពន្ធ ២នាក់នេះ បានទៅលេងផ្ទះបងប្រុស នៅក្នុងភូមិជាមួយគ្នា ហើយក៏កើតមានជម្លោះឈ្លោះទាស់ទែងគ្នា។ ពេលនោះប្រពន្ធបានជិះម៉ូតូ ទៅប្ដឹងប្រធានភូមិ ដើម្បីឲ្យប្រធានភូមិ បានដឹង និងចាត់វិធានការលើប្តី ដែលប្រើអំពើហិង្សាមកលើខ្លួនជាប្រពន្ធ ។
ក្រោយពេលប្តឹងប្រធានភូមិរួច ប្រពន្ធមិនបានទៅដេកផ្ទះវិញទេ គឺទៅសម្រាកនៅផ្ទះអ្នកជិតខាង ដែលស្គាល់ គ្នា ដោយមិនទុកចិត្តខ្លាចប្តីប្រើអំពើហិង្សាបន្ថែមទៀត។ លុះព្រឹកឡើងថ្ងៃទី២៥ ខែមីនា ឆ្នាំ២០២៥ ប្រពន្ធបានត្រឡប់ទៅផ្ទះវិញ ស្រាប់តែឃើញភ្លើងឆេះផ្ទះហ្មត់ គ្មានសល់អ្វីទាំងអស់ ភ្លាមនោះ ប្រពន្ធក៏បានជិះម៉ូតូទៅផ្ទះប្រធានភូមិម្តងទៀត ដើម្បីរាយការណ៍ ករណីភ្លើងឆេះផ្ទះ ។ នៅពេលប្រពន្ធទៅដល់ផ្ទះប្រធានភូមិ ស្រាប់តែឃើញប្តីនៅទីនោះដែរ ខណៈនោះប្រពន្ធមិនទាន់បានរៀបរាប់ករណីភ្លើងឆេះផ្ទះផង ស្រាប់តែលោកប្តីពោលពាក្យថា “អញដុតផ្ទះ កាលពីយប់មិញ” ។ បន្ទាប់មកប្ដីប្រពន្ធពីរនាក់នោះ ក៏ឈ្លោះប្រកែកគ្នាទៀតហើយប្ដីបានស្ទុះទៅវាយតប់ប្រពន្ធ ចំនួន២ ទៅ៣ដៃ ចំលើផ្ទៃមុខបណ្តាលឈឺចុកចាប់ ។
ប្រភពព័ត៌មានឲ្យដឹងទៀតថា ដោយឃើញទង្វើនិងសកម្មភាពបុរសជាប្តី បានប្រើអំពើហិង្សាលើគ្រួសារ រួមទាំងដុតបំផ្លិចបំផ្លាញផ្ទះសម្បែងទ្រព្យសម្បត្តិខ្លួន ឯង ឆេះហ្មត់យ៉ាងដូច្នេះ សមត្ថកិច្ចនគរបាលប៉ុស្តិ៍មូលដ្ឋាន សហការជាមួយកម្លាំងជំនាញ នៃអធិការដ្ឋាននគរបាលក្រុងសំរោង ក្រោមការចង្អុលបង្ហាញពីលោកឧត្តម សេនីយ៍ទោ ស្នងការនគរបាលខេត្តឧត្តរមានជ័យ និងស្នងការរងទទួលផែននគរបាលព្រហ្មទណ្ឌ បានធ្វើការឃាត់ខ្លួនជនបង្ក យកទៅសាកសួរដើម្បីកសាងសំណុំរឿងតាមនីតិវិធី៕
ដោយ៖ សូរិយា
