សារព័ត៌មាន នគរវត្ត តែងតែនាំមុខគេជានិច្ច
ប្រទេសចិន ៖ ក្នុងឱកាសដឹកនាំគណៈប្រតិភូបំពេញបេសកកម្មនៅសាធារណរដ្ឋប្រជាមានិតចិន នាថ្ងៃសុក្រ ១៥រោច ខែផល្គុន ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៨ ខែមីនា ឆ្នាំ២០២៥ នេះ លោក ចាន់ ស៊ីណាត រដ្ឋលេខាធិការ ក្នុងនាមតំណាងដ៏ខ្ពង់ខ្ពស់របស់ លោក ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានអញ្ជើញជួបប្រជុំពិភាក្សាការងារជាមួយ លោកបណ្ឌិត Rajat Misra អគ្គនាយកនៃធនាគារវិនិយោគហេដ្ឋារចនាសម្ព័ន្ធអាស៊ី(AIIB) នៅទីស្នាក់ការកណ្តាលរ នាទីក្រុងប៉េកាំង ប្រទេសចិន។
លោករដ្ឋលេខាធិការបានបញ្ជាក់ឱ្យដឹងថា កិច្ចប្រជុំនេះមានការចូលរួមពីមន្ត្រីពាក់ព័ន្ធសំខាន់ៗរបស់ធនាគារវិនិយោគហេដ្ឋារចនាសម្ព័ន្ធអាស៊ីជាច្រើនរូប ដើម្បីពិភាក្សាការងារដូចជា៖
ទី១)គម្រោងសាងសង់ប្រព័ន្ធធារាសាស្រ្តដែលមានលក្ខណៈធន់ទប់ទល់ទៅនឹងបម្រែបម្រួលអាកាសធាតុ។
ទី២)គម្រោងគ្រប់គ្រងវិស័យធនធានទឹកដោយវិធានការចម្រុះ ។
ទី៣)គម្រោងកាត់បន្ថយគ្រោះទឹកជំនន់ និងគ្រោះរាំងស្ងួត ។
ទី៤)ផែនការសកម្មភាពអនុវត្តន៍បន្ត ។
និងទី៥)របាយការណ៍គោរពជូនប្រធានស្ថាប័នទាំងពីរ គឺក្រសួងធនធានទឹក និងឧតុនិយម និងធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដើម្បីសុំការសម្រេចអនុវត្ត តាមរយៈក្រសួងសេដ្ឋកិច្ច និងហិរញ្ញវត្ថុ៕
ដោយ ៖ សិលា
