ព័ត៌មានទាន់ហេតុការណ៍៖

រថយន្តសាំយ៉ុងដឹកធូបបើកមិនប្រយ័ត្នរេចង្កូតក្រឡាប់ផ្ងារជើងទ្រមេឃ

ចែករំលែក៖

    ភ្នំពេញ៖ រថយន្តសាំយ៉ុង១គ្រឿង​ ខណៈអ្នកបើកបរដឹកធូបចេញពីប្រទេសវៀតណាមចូលរាជធានីភ្នំពេញ ដោយសារមេឃភ្លៀងរលឹមរអិលនិងផ្លូវកោងផងហើយបើកលឿនផងក៏ក្រឡាប់ផ្ងារជើង បណ្ដាលឲ្យរងការខូចខាត ប៉ុន្តែពុំបានបង្កឲ្យមានគ្រោះថ្នាក់ដល់អ្នកដទៃនោះទេ ចំណែកអ្នកបើកបររងរបួសស្រាល ។

ហេតុការនោះបានកើតឡើងកាលពីវេលាម៉ោង៧ព្រឹកថ្ងៃទី៣១ ខែមីនា ឆ្នាំ២០២៥ នៅតាមផ្លូវព្រៃស ភូមិពងទឹក សង្កាត់ពឹងទឹក ខណ្ឌដង្កោ រាជធានីភ្នំពេញ ។

តាមប្រភពពីកន្លែងកើតហេតុបានឲ្យដឹងថា នៅវេលាម៉ោងខាងលើគេបានឃើញរថយន្តម៉ាកសាំយ៉ុង១គ្រឿង​ ពណ៍ស ពាក់ផ្លាកលេខភ្នំពេញ2H-0021 ធ្វើដំណើរតាមបណ្តោយផ្លូវបេតុងព្រៃសបើកបរក្នុងល្បឿនលឿន ក្នុងទិសដៅពីលិចទៅកើត ។ លុះពេលទៅដល់ត្រង់ចំណុចកើតហេតុផ្លូវកោង ដោយសារតែមេឃភ្លៀងរលឹមផ្លូវរអិលផងនិងបើកលឿនផង ក៏បានក្រឡាប់ផ្ងារជើងទាំងកំរោលតែម្ដង ។ 

ប្រភពដដែលបានឲ្យដឹងបន្តទៀតថា ខណៈនោះអ្នកភូមិបានទៅមើលឃើញក្នុងរថយន្តនោះសុទ្ធតែធូប ដែលអ្នកបើកបររថយន្តប្រាប់ថាដឹកមកពីប្រទេសវៀតណាម ដាក់នៅរាជធានីភ្នំពេញហើយដល់ចំណុចកើតហេតុស្រាប់តែក្រឡាប់បែបនេះតែម្ដង ។ ប៉ុន្តែជាសំណាងល្អពុំបានបង្កឲ្យមានគ្រោះថ្នាក់ដល់អ្នកដទៃនោះទេ ចំណែកអ្នកបើកបររថយន្តនេះបានរងរបួសស្រាលប៉ុណ្ណោះ ហើយក្រោយពេលកើតហេតុសមត្ថកិច្ចបានឲ្យម្ចាស់យករថយន្តស្ទូចទៅស្ទូចយករថយន្តនោះទៅធ្វើការជួសជុលឡើងវិញដោយខ្លួនឯង ៕

ដោយ​ ៖​ ភារ៉ា​ ដង្កោ


ចែករំលែក៖