ប្រទេសចិនពិភាក្សាអំពីការពង្រឹងកិច្ចសហប្រតិបត្តិការពាណិជ្ជកម្មជាមួយអាស៊ាន

ចែករំលែក៖

មាត្រដ្ឋានសេដ្ឋកិច្ចរបស់អាស៊ានគឺធំជាងគេទី៥ក្នុងពិភពលោកដែលមានប្រជាជន៦៨០លាននាក់។ មេដឹកនាំប្រទេសចិននិយាយថា ខ្លួនមានឆន្ទៈក្នុងការធ្វើការជាមួយអាស៊ាន ដើម្បីពង្រឹងកិច្ចសហប្រតិបត្តិការពាណិជ្ជកម្ម។
នៅថ្ងៃទី១០ ខែមេសា ទីភ្នាក់ងារសារព័ត៌មានរ៉យទ័របានដកស្រង់ព័ត៌មានពីក្រសួងពាណិជ្ជកម្មចិនថា រដ្ឋមន្ត្រីក្រសួងពាណិជ្ជកម្មរបស់ប្រទេសគឺលោក Wang Wentao ទើបតែបានពិភាក្សាជាមួយសមភាគីម៉ាឡេស៊ីលោក Zafrul Aziz ។
លោក Wang បាននិយាយថា ប្រទេសចិនមានឆន្ទៈក្នុងការធ្វើការជាមួយដៃគូពាណិជ្ជកម្ម រួមទាំងប្រទេសអាស៊ានផងដែរ ដើម្បីពង្រឹងការផ្លាស់ប្តូរនិងការសម្របសម្រួល។
ភាគីទាំងពីរបានពិភាក្សាអំពីការពង្រឹងទំនាក់ទំនងចិន-ម៉ាឡេស៊ី ក៏ដូចជាការពង្រឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងចិននឹងអាស៊ាន។ បច្ចុប្បន្នម៉ាឡេស៊ីកំពុងកាន់តួនាទីជាប្រធានអាស៊ាន។
លោករដ្ឋមន្ត្រី Wang Wentao បានសង្កត់ធ្ងន់ថា ទីក្រុងប៉េកាំងមានឆន្ទៈក្នុងការដោះស្រាយកង្វល់តាមរយៈការសន្ទនា និងការពិគ្រោះយោបល់ដោយឈរលើមូលដ្ឋានស្មើភាព និងរួមគ្នាការពារប្រព័ន្ធពាណិជ្ជកម្មពហុភាគី ក្នុងបរិបទដែលអាមេរិកដាក់ពន្ធខ្ពស់។
ភាគីទាំងពីរមានធ្វើសន្និសិទតាមវីដេអូមួយនៅថ្ងៃទី 9 ខែមេសា ដែលជាថ្ងៃដែលពន្ធគយទៅវិញទៅមកដ៏គួរឱ្យភ្ញាក់ផ្អើលរបស់រដ្ឋបាល Trump លើប្រទេស/ដែនដីរាប់សិបបានចូលជាធរមាន។
នៅក្នុងសុន្ទរកថាជាសាធារណៈលើកដំបូងរបស់គាត់ ចាប់តាំងពីសង្គ្រាមពាណិជ្ជកម្មរវាងអាមេរិក នឹងចិនកើនឡើងកាលពីថ្ងៃទី 9 ខែមេសា ប្រធានាធិបតីចិន Xi Jinping បាននិយាយថា ទីក្រុងប៉េកាំងនឹងពង្រឹងទំនាក់ទំនងជាយុទ្ធសាស្ត្រជាមួយប្រទេសជិតខាងដោយដោះស្រាយភាពខុសគ្នាឱ្យបានត្រឹមត្រូវ និងពង្រឹងទំនាក់ទំនងខ្សែសង្វាក់ផ្គត់ផ្គង់។
នៅថ្ងៃដដែល ក្រសួងពាណិជ្ជកម្មចិនបានសង្កត់ធ្ងន់ថា ជាមួយនឹងឆន្ទៈដ៏ម៉ឺងម៉ាត់ និងធនធានដ៏បរិបូរណ៍ ប្រទេសចិននឹងចាត់វិធានការយ៉ាងម៉ឺងម៉ាត់ និងតស៊ូរហូតដល់ទីបញ្ចប់ ប្រសិនបើអាមេរិកទទូចចង់បន្តបង្កើនការរឹតបន្តឹងសេដ្ឋកិច្ច និងពាណិជ្ជកម្ម៕ដោយ៖ ធីរីណា