🔥ឆ្លងចរន្ដអគ្គិសនីឆាបឆេះឃ្លាំងសិប្បកម្មផលិតកៅអីសាឡុង ខូចខាតសម្ភារៈអស់មួយចំនួន

ភ្នំពេញ ៖ អគ្គិភ័យបានឆាបឆេះសិប្បកម្មផលិតកម្មកៅអីសាឡុងផ្អើលរថយន្តពន្លត់អគ្គិភ័យជាច្រើនគ្រឿងចេញ មកអន្តរាគមន៍បាញ់ពន្លត់ តែសម្ភារៈក្នុងឃ្លាំងបានរងការខូចខាតអស់មួយចំនួន។

ហេតុការណ៍នេះបានកើតឡើងនៅវេលាម៉ោង ៤និ២០នាទីទៀបភ្លឺថ្ងៃទី០៥ខែមិថុនាឆ្នាំ២០២៥នៅចំណុចឃ្លាំងសិប្បកម្មផលិតកៅអីសាឡុងមួយកន្លែង តាមបណ្តោយផ្លូវលេខ៣៧១សឡា ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។

តាមប្រភពព័ត៌មានពីប្រជាពលរដ្ឋដែលរស់នៅជិតកន្លែងកើតហេតុបានអោយដឹងថា មុនពេលកើតហេតុពួកគាត់ដែលរស់ នៅម្តុំផ្ទះល្វែងជាប់ឃ្លាំងសិប្បកម្មខាងលើ បានធំុផ្សែងឈ្ងៀម ក៏បានបើកទ្វារចេញរកមើល ក៍ស្រាប់តែឃើញមានអណ្តាតភ្លើងឆេះឃ្លាំងផ្នែកខាងក្រោយ ក៏បានរត់ទៅប្រាប់សន្តិសុខដែលយាមនៅខាងមុខ អោយហៅម្ចាស់ឃ្លាំងបើកសោចូលទៅមើល ក៏ស្រាប់តែឃើញមានភ្លើងឆេះសន្ធោសន្ធៅ ចេញពីឃ្លាំងស្តុកកម្ទេចឈើកុងប្លាកេសំរាប់ធ្វើកៅអីសាឡុង ទើបនាំគ្នាឆោឡោសុំជំនួយរថយន្តពន្លត់អគ្គិភ័យអោយជួយចេញអន្តរាគមន៍បាញ់ទឹកពន្លត់តែម្តង ។

ករណីនេះផងដែរបន្តិចក្រោយមកក៏មានវត្តមានសមត្ថកិច្ចនិងរថយន្តពន្លត់អគ្គិភ័យរបស់ការិយាល័យបង្ការនិងពន្លត់អគ្គិភ័យ ជាច្រើនគ្រឿងបានចុះមកដល់កន្លែងកើតហេតុ។

ប្រភេទសំណង់: ថ្ម ប្រក់សង្ក័សី ទំហំ ៣០ម៉ែត្រx៥០ម៉ែត្រ។

-ខូចខាតសម្ភារៈ ឆេះបន្ទប់ស្តុកកុងផ្លាកេចំនួន១៥០សនឹ្លកទំហំ០៨ម៉ែត្រx១២ម៉ែត្រ។ 

ក្នុងប្រតិបត្តិការនេះមានរថយន្តការិយាល័យពន្លត់អគ្គិភ័យចំនួន ០៧គ្រឿង ប្រេីប្រាស់ទឹកអស់ចំនួន ១៤ឡានស្មើនឹង៦៥ម៉ែត្រគូប។

• រថយន្តជំនួយ៖ រថយន្តក្រុមហ៊ុនស្រាបៀរកម្ពុជាចំនួន០១គ្រឿង ប្រើប្រាស់ទឹកអស់ចំនួន០១ឡានស្មើនឹង០៦ម៉ែត្រគូប។ពន្លត់ចប់នៅម៉ោង៧និង៣០នាទីព្រឹក នាថ្ងៃខែឆ្នាំដដែល។  

ករណីនេះផងដែរ សមត្ថកិច្ចបានអោយដឹងថា មិនមានការឆេះរាលដាលដល់ផ្ទះសម្បែងរបស់ប្រជាពលរដ្ឋណានោះទេ គ្រាន់តែខូចខាតកម្ទេចឈើ និងឈើពិតានអស់មួយចំនួនតែប៉ុណ្ណោះ។ចំពោះមូលហេតុបណ្តាលមកពីឆ្លងចរន្តអគ្គិសនី ៕

ដោយ​ ៖​ ភារ៉ា​ ដង្កោ