🔥យកឈើបុកថ្នាំដែលកកនៅក្នុងប៊ីដុងបណ្តាលឲ្យផ្ទុះឡើងរបួសធ្ងន់ស្រាល០២នាក់

ខេត្តបាត់ដំបង៖ បុរស០២នាក់បានរងរបួសធ្ងន់ស្រាលក្រោយផ្ទុះប៊ីដុងថ្នាំបង្កជាអគ្គិភ័យកាលពីវេលាម៉ោង ២០និង៤៥ នាទី ថ្ងៃទី០៤ ខែកក្កដា ឆ្នាំ២០២៥ នៅចំណុចភូមិដីក្រហម ឃុំតាសែន ស្រុកកំរៀង ខេត្ត បាត់ដំបង ។

ករណីផ្ទុះប៊ីដុងថ្នាំខាងលើនេះ បណ្តាលឲ្យបុរស២នាក់រងរបួសធ្ងន់ស្រាល ដែលម្នាក់ឈ្មោះ ខំ សំណាង ហៅ (ចក់) ភេទប្រុស អាយុ ២៩ឆ្នាំ មុខរបរកម្មករ មានទីលំនៅភូមិឃុំកើតហេតុខាងលើ(របួសធ្ងន់) និងម្នាក់ ទៀតឈ្មោះ រឿម សុផល ភេទប្រុស អាយុ ៣៣ឆ្នាំ មុខរបរកម្មករ (រងរបួសស្រាល) ទាំងពីរនាក់រស់នៅភូមិដីក្រហម ឃុំតាសែន ស្រុកកំរៀង ខេត្តបាត់ដំបង រួមជាមួយសម្ភារៈខូចខាតរួមមាន ៖ ពាងទឹក០១ ,ឆេះម៉ូតូ ០១គ្រឿង ,ប៉ើងដំបូលរោងអស់ស័ង្កសី ២០សន្លឹក ,និងឆេះថ្នាំសំរាប់ដាក់តាង៉ែនចំនួន០៥ប៊ីដុង ក្នុងមួយប៊ីដុង០៥លីត្រ។

សមត្ថកិច្ចបានបញ្ជាក់ថា មូលហេតុផ្តើមចេញពីជន រងគ្រោះបានយកឈើទៅបុកថ្នាំដែលកកនៅក្នុងប៊ីដុង ក៏បណ្ដាលឲ្យផ្ទុះឡើងតែម្តង។ បន្ទាប់មកជនរងគ្រោះត្រូវបានក្រុមគ្រួសារបញ្ជូនទៅសង្គ្រោះព្យាបាលនៅមន្ទីរពេទ្យស្រុកសំពៅលូន៕

ដោយ៖ សូរិយា