សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ យោងតាមការផ្សាយដំណឹងរបស់ទីភ្នាក់ងារសារព័ត៌មានកណ្តាលរបស់កូរ៉េខាងជើងនៅថ្ងៃទី ១០ ខែសីហាឱ្យដឹងថា លោក No Kwang Chol រដ្ឋមន្ត្រីក្រសួងការពារជាតិកូរ៉េខាងជើង បានថ្លែងសុន្ទរកថា ដោយថ្កោលទោសអាមេរិកនិងកូរ៉េខាងត្បូងដែលបានប្រកាសថា ចាប់ពីថ្ងៃទី១៨ ខែសីហាតទៅ នឹងធ្វើសមយុទ្ធទ្រង់ទ្រាយធំឈ្មោះ Ulchi Freedom Shield ។ លោកអះអាងថា ទង្វើរបស់អាមេរិកនិងកូរ៉េខាងត្បូងលើកនេះ នឹងនាំមកនូវការប្រឈមយ៉ាងធ្ងន់ធ្ងរម្តងទៀតដល់ស្ថានការណ៍សន្តិសុខនៅឧបទ្វីបកូរ៉េ ។
សុន្ទរកថានេះបានបន្តថា សមយុទ្ធរួម ឈ្មោះ Ulchi Freedom Shield នឹងធ្វើឡើងដោយប្រឌិតពីសង្គ្រាមនុយក្លេអ៊ែរពិត ប្រការនេះវាមិនត្រឹមតែជាការបង្ករឿងខាងយោធាដោយផ្ទាល់ចំពោះកូរ៉េខាងជើងប៉ុណ្ណោះទេ ប៉ុន្តែថែមទាំងនឹងធ្វើឱ្យភាពមិនអាចប៉ាន់ប្រមាណបាននៃស្ថានការណ៍ឧបទ្វីបកូរ៉េដែលកំពុងឋិតក្នុងសភាពឈប់បាញ់គ្នាមានសភាពកាន់តែធ្ងន់ធ្ងរ ហើយនឹងបង្កបង្កើតជាការគំរាមកំហែងដ៏ពិតប្រាកដដែលបណ្តាលឱ្យស្ថានការណ៍ក្នុងតំបន់អស្ថិរភាព ។
សុន្ទរកថានេះបានបន្តថា កងកម្លាំងកូរ៉េខាងជើងនឹងប្រកាន់អាកប្បកិរិយាយ៉ាងមោះមុតនិងដាច់ម៉ាត់ ដើម្បីឆ្លើយតបនឹងសកម្មភាពសមយុទ្ធសង្គ្រាមរបស់អាមេរិកនិងកូរ៉េខាងត្បូង ព្រមនិងការពារសិទ្ធិអធិបតេយ្យយ៉ាងម៉ឺងម៉ាត់ក្នុងក្របខ័ណ្ឌសិទ្ធិការពារខ្លួនឯងចំពោះរាល់ទង្វើដែលបង្ករឿងនិងបំពានបន្ទាត់ក្រហមទាំងអស់ ៕ដោយ៖តារា
រូបថត៖ លោក No Kwang Chol រដ្ឋមន្ត្រីក្រសួងការពារជាតិកូរ៉េខាងជើង
