សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់ ៖ ជនជាតិវៀតណាមម្នាក់ ត្រូវបានកម្លាំងអធិការដ្ឋាននគរបាលស្រុកកណ្ដៀង ព័ទ្ធចាប់នៅលើដងផ្លូវ១ខ្សែបន្ទាប់ទទួលព័ត៌មានពីចារកម្មរបស់ខ្លួន រួមទាំងដកហូតម្សៅក្រាមពណ៏សថ្លាសង្ស័យជាសារធាតុញឿនចំនួន១៨កញ្ចប់ និងកាណូត១គ្រឿង នេះបើតាមការបញ្ជាក់ពីលោកអធិការនៃអធិការដ្ឋាននគរបាលស្រុកកណ្ដៀង នាព្រឹកថ្ងៃពុធ ១០រោច ខែភទ្របទ ឆ្នាំម្សាញ់ សប្គស័ក ព.ស ២៥៦៩ ត្រូវនឹងថ្ងៃទី១៧ ខែកញ្ញា ឆ្នាំ២០២៥ នេះ ។
លោក អធិការនគរបាលឲ្យដឹងទៀតថា ករណីបង្រ្កាបជនសង្ស័យជនជាតិវៀតណាមជាមុខសញ្ញារួមទាំងវត្ថុតាងខាងលើ នៅលើកំណាត់ផ្លូវលំក្រាលគ្រួសក្រហម១ខ្សែ ក្បែរមណ្ឌលសុខភាពកញ្ជរ ស្ថិតនៅភូមិផ្លូវលួង ឃុំកញ្ជរ ស្រុកកណ្ដៀង ខេត្តពោធិ៍សាត់ ។
លោក បញ្ជាក់ទៀតថា ជនសង្ស័យជនជាតិវៀតណាមត្រូវបានកម្លាំងបង្រ្កាបឈ្មោះ ង្វៀង យ៉ាំងហុង ភេទប្រុស អាយុ ៤៤ឆ្នាំ បច្ចុប្បន្ន ស្នាក់នៅផ្ទះផែបណ្ដែតលើផ្ទៃទឹកបឹងទន្លេសាប ស្ថិតនៅភូមិកោះក្អែង ឃុំរាំងទិល ស្រុកកណ្ដៀង ខេត្តពោធិ៍សាត់ ជននេះជាមុខសញ្ញាចែកចាយ ដោយយកពីលើគោកទៅចែកចាយនៅលើផ្ទៃទឹក ។
លោកបញ្ជាក់បន្ថែមទៀតថា ក្នុងនោះកម្លាំងឆែកឆេក្នុងឃ្លប់ក្បាលកាណូតរកឲ្យឃើញ និងដកហូតរួមមាន ម្សៅក្រាមពណ៏សថ្លាសង្ស័យសារធាតុញៀនចំនួន១៨កញ្ចប់ រួមទាំងកាណូតចំនួន០១គ្រឿង បច្ចុប្បន្ន ជនសង្ស័យជនជាតិវៀតណាម ត្រូវបានកម្លាំងបង្រ្កាបរួមទាំងវត្ថុតាង កំពុងបំពេញនីតិវិធីនៅអធិការដ្ឋាននគរបាលស្រុកកណ្ដៀង ដើម្បីបញ្ជូនបន្តទៅការិយាល័ជំនាញនៃស្នពោធិ៍សាត់ចាត់ការបន្ត ៕ ដោយៈ ប៉ឹម ពិន
