សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់បានជិះម៉ូតូស្មាក់វីក្នុងល្បឿនយ៉ាងលឿន ហើយមិនប្រយ័ត្នបានជ្រុលទៅបុករថយន្តសិុនទ្រីពីក្រោយពេញទំហឹងបណ្ដាលឲ្យស្លាប់ភ្លាមៗនៅនិងកន្លែងកើតហេតុ ។
ហេតុការណ៍នេះ បានបង្កការភ្ញាក់ផ្អើលកាលនៅវេលាម៉ោង០០និង៥០នាទីរំលងអធ្រាត្រ ឈានចូលថ្ងៃទី២៨ ខែកញ្ញា ឆ្នាំ២០១៦ នៅតាមបណ្ដោយផ្លូវព្រះមុន្នីរ៉េត ចំណុចក្បែរនិងច្រកចូលប៉ុស្តិ៍ស្ទឹងមានជ័យ ស្ថិតក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ ។
យុវជនដែលស្លាប់ក្នុងហេតុការណ៍គ្រោះថ្នាក់ចរាចរណ៍ខាងលើ មានឈ្មោះ អោ អួនម៉ូលី ភេទប្រុស អាយុ២៤ឆ្នាំ មុខរបរជា IT មានស្រុកកំណើតនៅភូមិអង្គក្រឡាញ់ ឃុំជាងទង ស្រុកត្រាំកក់ ខេត្តតាកែវ រីឯម៉ូតូរបស់ជនរងគ្រោះម៉ាក ស្មាស់វី ពណ៌ខ្មៅ ពាក់ស្លាកលេខ ភ្នំពេញ 1AU.9167 ។
តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានប្រាប់ឲ្យដឹងថា នៅមុនពេលកើតហេតុនោះ គេបានឃើញ រថយន្តសិុនទ្រី បានបើកបរតាមបណ្ដោយផ្លូវព្រះមុនីរ៉េត ក្នុងទិសដៅពីកើតទៅលិច ដោយបើកមកសន្សឹមៗ ដើម្បីយកសំរាម ហើយមកដល់ចំណុចកើតហេតុនោះរថយន្តសិុនទ្រី ក៏បានឈប់យកសំរាម ពេលនោះស្រាប់តែមានយុវជនរងគ្រោះខាងលើបានជិះម៉ូតូស្របទិសគ្នា ក្នុងល្បឿនយ៉ាងលឿន និងមិនប្រយ័ត្នក៏ជ្រុលទៅបុករថយន្តសិុនទ្រីពីក្រោយពេញទំហឹងបណ្ដាលឲ្យយុវជនរូបនោះបោកផ្ទុបទៅនិងរថយន្តស្លាប់ភ្លាមៗនៅនិងកន្លែង ចំណែកឯម៉ូតូជនរងគ្រោះបានរងការខូចខាតខាងមុខទាំងស្រុងហើយអ្នកបើកបរនិងកម្មករកើបសំរាមនោះបានរត់គេចខ្លួនបាត់ស្រមោលភ្លាមៗផងដែរ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ រួចទំនាក់ទំនងទៅជំនាញចរាចរណ៍ក្រុងមកវាស់វែងយករថយន្ត និងម៉ូតូទៅរក្សាទុកនៅការិយាល័យចរាចណ៍ជើងគោករាជធានីរង់ចាំដោះស្រាយតាមនីតិវិធីច្បាប់ ។
ចំណែកឯសាកសពត្រូវបានសមត្ថកិច្ចធ្វើឯកសារប្រគល់សាច់ញាតិជនរងគ្រោះយកទៅធ្វើបុណ្យតាមប្រពៃណីនៅស្រុកកំណើត ៕ ជីម ភារ៉ា ដង្កោ
