សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្រាប់សប្តាហ៍ទី២ នៃការប្រកួតកីឡាប្រដាល់ដណ្តើមជើងឯកTV5 Knock Out Series ទម្ងន់៥៤គីឡូក្រាមតម្រូវលើកីឡាករ ៤នាក់ប្រកួតជម្រុះចុងក្រោយ ក្នុងដំណាក់កាលទី៣ នាថ្ងៃទី៩ ខែតុលា ឆ្នាំ២០១៦នេះ គឺកីឡាករ នីម នន មកពីក្លិបកងពលតូចទ័ពឆ័ត្រយោង៩១១ ប៉ះជាមួយ កីឡាករ មាឃ សុវណ្ណារ៉ា មកពីក្លិបរាជសីហ៍ខេត្តរតនគិរី និងកីឡាករ លីន វិបុល មកពីក្លិបបូរីរាជសីហ៍មានរិទ្ធ ប្រកួតជាមួយ កីឡាករប៊ុន សុធា មកពីក្លិបមជ្ឈមណ្ឌលកីឡា ខ.ភ.មនៅសង្វៀនធីហ្វីអារិណា ។
ចំពោះការប្រកួតវគ្គជម្រុះចុងក្រោយនេះ អ្នកឈ្នះបានឡើងទៅប្រកួតក្នុងដំណាក់កាលទី៤ វគ្គពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រ ដើម្បីដណ្ដើមពានរង្វាន់ជើងឯកTV5 Knock Out Series ទម្ងន់៥៤គីឡូក្រាម ឯអ្នកចាញ់គឺត្រូវចាកចេញតែម្តង។ ជំនួបរវាង នីម នន និង មាឃ សុវណ្ណារ៉ា ពួកគេមិនធ្លាប់ជួបគ្នាទេកន្លងមក។ ប៉ុន្តែកាលពីប្រកួតក្នុងដំណាក់កាលទី២ នីម នន វាយឈ្នះ រស់ វិបុល មកពីក្លិបសាលវ័ន្តកីឡាដោយពិន្ទុនិង មាឃ សុវណ្ណារ៉ា វាយឈ្នះប្រាក់ ស៊ីណាត មកពីក្លិបតាឯកដំបងដែកមានរិទ្ធខេត្តព្រៃវែងដោយពិន្ទុដូចគ្នា។
ដោយឡែកការប្រកួតរវាង លីន វិបុល និង ប៊ុន សុធា ពួកគេពិបាកធ្វើការសន្និដ្ឋានចំពោះលទ្ធផលចុងក្រោយណាសថា នរណាឈ្នះនរណាចាញ់ ព្រោះ លីន វិបុល គេជាអ្នកប្រដាល់ដែលមានកម្លាំងខ្លាំងសម្បទារឹងមាំ។ ដំណាក់កាលទី២ លីន វិបុល វាយឈ្នះ ពេជ្រ សាម៉ុន មកពីក្លិបរាជសីហ៍ខេត្តបន្ទាយមានជ័យដោយពិន្ទុ និង ប៊ុន សុធា វាយឈ្នះ គឿម សុវណ្ណឌឿត មកពីក្លិបមោងឬស្សីមរតកគុនខ្មែរខេត្តបាត់ដំបងដោយពិន្ទុដែរ។គួររំលឹកថា សប្តាហ៍ទី១ បានរកឃើញកីឡាករដែលឡើងទៅរងចាំការប្រកួតវគ្គពាក់កណ្តាលផ្តាច់ព្រ័ត្រនិងផ្តាច់ព្រ័ត្ររួចហើយ គឺកីឡាករ ស្រៀង ទិតធិ មកពីក្លិបសម្បត្តិគុនខ្មែរ និងឈុន បញ្ញា មកពីក្លិបរ៉ាហាប់ស្វាយប៉ាក ។
ចំពោះការប្រកួត គូពិសេសអមជាមួយគូប្រកួតដណ្តើមចំណាត់ថ្នាក់ខាងលើតម្រូវលើកីឡាករ ឆាយ មាស ជើងចាស់មកពីក្លិបសំរោងកោងខេត្តបាត់ដំបង ជួបជាមួយ ម៉ន លីហួរមកពីក្លិបការិយាល័យទី៥ កងទ័ពជើងគោកក្នុងប្រភេទទម្ងន់៦០គីឡូក្រាម ។ ឆាយ មាស គេពោរពេញទៅដោយបទពិសោធន៍ជោកជាំក្នុងការប្រកួតលើរេញ ប៉ុន្តែមិនទាន់ប្រាកដថា អាចឈ្នះ ម៉ន លីហួរ បានដោយស្រួលនោះទេ ព្រោះ លីហួរ ក៏ខ្លាំងដែរ កាយសម្បទារឹងមាំជាងឆាយ មាស ។
វីរៈ ខាំឈីត ក្លិបអេភូថងកីឡា នឹងជួបប្រកួតជាមួយ វី សុភ័ស្ស ក្លិបនាគរាជមានជ័យ ជាលក្ខណៈប្រដាល់សកលអាជីព ក្នុងប្រភេទទម្ងន់៥៦គីឡូក្រាម។ ចាំមើល ជួបជាលក្ខណៈសកលអាជីព វីរៈ ខាំឈីត អាចវាយឈ្នះ វី សុភ័ស្ស ឬអត់? ៕ សារីម
