សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ កំលាំងកងរាជអាវុធហត្ថខេត្តតាកែវ និងខេត្តកំពង់ស្ពឺ កាលពីវេលាម៉ោង៦ និង៥០នាទីព្រឹកថ្ងៃទី២៩ ខែវិច្ឆិកា ឆ្នាំ២០២៥ បានរកឃើញកាំភ្លើងខ្លីចំនួន២ដើម គ្រាប់ជិត២០០គ្រាប់ ម្សៅក្រាមសង្ស័យ ថ្នាំញៀន ៣កញ្ចប់ធំ រួមនិងរថយន្តស៊េរីទំនើប២គ្រឿងព្រមទាំងសម្ភារៈជាច្រើនទៀត ក្នុងប្រតិបត្តិការចូលឆែកឆេរផ្ទះជនសង្ស័យម្នាក់ ស្ថិតនៅក្នុងភូមិត្មាតលេង ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ។ ប៉ុន្តែជនសង្ស័យបានរត់គេចបាត់ដោយសុវត្ថិភាព។
សមត្ថកិច្ច បានឱ្យថា កម្លាំងមូលដ្ឋានកងរាជអាវុធហត្ថ ស្រុកបរសេដ្ឋខេត្តកំពង់ស្ពឺ និងបានសហការជាមួយកងកម្លាំងកងរាជអាវុធហត្ថខេត្តតាកែវ ចុះឆែកឆេរលំនៅឋានរបស់ឈ្មោះ សែម រក្សា ភេទស្រី អាយុ២៣ឆ្នាំ មុខរបរកម្មការិនីរោងចក្រ ស្ថិតនៅភូមិត្មាតលេង ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ប៉ុន្តែជនសង្ស័យបានរត់គេចខ្លួនបាត់ហើយ។
មន្ត្រីសមត្ថកិច្ចខេត្តកំពង់ស្ពឺបានបន្តថា ក្រោយឆែកឆេរទីតាំងខាងលើ កម្លាំងជំនាញដកហូតវត្ថុតាង÷ ~ម្សៅក្រាមពណ៌សថ្លាសង្ស័យជាគ្រឿងញៀន៣កញ្ចប់ធំ ~រថយន្តស៊េរីទំនើប២គ្រឿង,ម៉ូតូ១គ្រឿង,កាំភ្លើងខ្លីម៉ាក់ឡុកចំនួន០២ដើម បង់ចំនួន០៣(គ្រាប់ចំនួន១៨១គ្រាប់) និងសម្ភារៈប្រើប្រាស់គ្រឿងញៀនមួយចំនួនថែមទៀតផងដែរ៕
