សារព័ត៌មាន នគរវត្ត តែងតែនាំមុខគេជានិច្ច
បាល់ទាត់ឥណ្ឌូណេស៊ីបានបោះជំហានដែលមិនធ្លាប់មានពីមុនមកក្នុងការហាមឃាត់កីឡាករពីរនាក់ជាអចិន្ត្រៃយ៍ បន្ទាប់ពីឧប្បត្តិហេតុហឹង្សាជាបន្តបន្ទាប់ដែលបានធ្វើឱ្យលីគក្នុងស្រុករបស់ប្រទេសស្ថិតក្នុងស្ថានភាពគួរឱ្យព្រួយបារម្ភ។
ការដាក់ទណ្ឌកម្មបានធ្វើឡើងបន្ទាប់ពីឧប្បត្តិហេតុដ៏គួរឲ្យរន្ធត់ចំនួនពីរក្នុងការប្រកួត Liga 4 ដែលបានកើតឡើងក្នុងខែមករា។ ក្នុងការប្រកួតរវាង Universitas Ahmad Dahlan (UAD) និង Kampungqu Football Indonesia (KAFI) នៅថ្ងៃទី 8 ខែមករា Dwi Pilihanto Nugroho បានទាត់ Amirul Mutaqin ចំក្បាលនៅនាទីទី 78 ។
ខណៈពេលដែលអាជ្ញាកណ្តាលបានចេញកាតលឿងដំបូង Mutaqin ត្រូវបានបញ្ជូនទៅមន្ទីរពេទ្យដោយមានការឈឺចាប់ថ្គាមធ្ងន់ធ្ងរ ហើយត្រូវធ្វើការស្កេន X-ray ។ លទ្ធផលបង្ហាញថាគ្មានឆ្អឹងបាក់ទេ ប៉ុន្តែ Mutaqin នៅតែមានអារម្មណ៍ឈឺចាប់ពេលនិយាយ និងទំពារ ទាមទារការត្រួតពិនិត្យបន្ថែមរយៈពេល 6-7 ថ្ងៃ ហើយអាចស្កេន CT ប្រសិនបើស្ថានភាពមិនប្រសើរឡើង។
លោក Muhammad Hasanudin អ្នកចាត់ការទូទៅរបស់ KAFI បាននិយាយថា “សង្ឃឹមថាឧបទ្ទវហេតុនេះនឹងធ្វើជាមេរៀនសម្រាប់កីឡាករទាំងអស់ និងអ្នកពាក់ព័ន្ធក្នុងវិស័យបាល់ទាត់ឥណ្ឌូនេស៊ី ហើយនឹងការពារការកើតឡើងម្តងទៀតនាពេលអនាគត” ។ គ្រាន់តែបីថ្ងៃមុន ការជួបគ្នាដ៏ឃោរឃៅមួយផ្សេងទៀតបានកើតឡើងក្នុងអំឡុងពេលការប្រកួតរវាង ក្រុម Putra Jaya និង Perseta 1970 Tulungagung ក្នុងក្របខណ្ឌ Liga 4 ។
កីឡាករ Muhammad Hilmi Gimnastiar របស់ក្រុម Putra Jaya បានទាត់ “ក្បាច់កុងហ្វូ” ចូលទៅក្នុងទ្រូងរបស់ កីឡាករ Firman Nugraha Adhiansyah នេះបើយោងតាមសារព័ត៌មាន beIN SPORTS ។
សមាគមកីឡាបាល់ទាត់ជ្វាខាងកើត (PSSI Jatim) បានឆ្លើយតបដោយការដាក់បម្រាមមិនឱ្យចូលលេងបាល់ទាត់ពេញមួយជីវិតលើកីឡាករ Gimnastiar និងពិន័យជាប្រាក់ចំនួន 2.5 លានរូពី (148 ដុល្លារអាមេរិក) ។ ដូចក្រុម KAFI ដែរ ក្លឹបPutra Jayaក៏បាន បានបញ្ឈប់កិច្ចសន្យារបស់កីឡាករ Gimnastiar ភ្លាមៗ។
អំពើហឹង្សាជាប់ៗគ្នាទាំងនេះបានបង្កឱ្យមានការជជែកវែកញែកអំពីការធ្លាក់ចុះនៃស្តង់ដារវិន័យ និងអត្តចរិតកីឡានៅក្នុងកីឡាបាល់ទាត់ឥណ្ឌូនេស៊ី។ ក្រុមអ្នកសង្កេតការណ៍ព្រមានថា ការកើនឡើងជាញឹកញាប់នៃការប៉ះគ្នាដោយហឹង្សាបង្ហាញថាស្មារតីនៃការប្រកួតកំពុងបាត់បង់។ បើគ្មានវិធានការខ្លាំងទេ កិត្យានុភាព និងការអភិវឌ្ឍន៍កីឡាក្នុងប្រទេសឥណ្ឌូនេស៊ីនឹងបន្តត្រូវបានរារាំង៕
