តម្លៃប្រេងធ្លាក់ចុះ ខណៈអាមេរិក និង អ៊ីរ៉ង់ ត្រៀមពិភាក្សានុយក្លេអ៊ែរជុំបន្ទាប់

តម្លៃប្រេងបានធ្លាក់ប្រហែល 1% កាលពីថ្ងៃចន្ទ ខណៈសហរដ្ឋអាមេរិក និងអ៊ីរ៉ង់ ត្រៀមធ្វើកិច្ចពិភាក្សានុយក្លេអ៊ែរជុំទី 3 ដែលបន្ធូរបារម្ភអំពីជម្លោះអាចកើនឡើង។ ទន្ទឹមនឹងនេះ ប្រធានាធិបតីអាមេរិក Donald Trump បានប្រកាសបង្កើនពន្ធគយថ្មី បង្កើតភាពមិនប្រាកដប្រជាចំពោះកំណើនសេដ្ឋកិច្ចពិភពលោក និងតម្រូវការប្រេងឥន្ធនៈ។

ប្រេង Brent បានធ្លាក់ចុះ 87 សេន ឬ 1.21% មកត្រឹម 70.89 ដុល្លារក្នុងមួយបារ៉ែល ខណៈប្រេង West Texas Intermediate (WTI) របស់អាមេរិក ធ្លាក់ 85 សេន ឬ 1.28% មកត្រឹម 65.63 ដុល្លារក្នុងមួយបារ៉ែល គិតត្រឹមម៉ោង 0722 GMT។

លោក Trump បាននិយាយកាលពីថ្ងៃសៅរ៍ថា លោកនឹងបង្កើនពន្ធបណ្តោះអាសន្នពី 10% ទៅ 15% លើទំនិញនាំចូលពីគ្រប់ប្រទេស ដែលជាកម្រិតអតិបរមាអនុញ្ញាតដោយច្បាប់ បន្ទាប់ពីតុលាការកំពូលអាមេរិកបានលុបចោលកម្មវិធីពន្ធមុនរបស់លោក។

អ្នកវិភាគទីផ្សារ IG លោក Tony Sycamore បាននិយាយថា ព័ត៌មានពន្ធគយចុងសប្ដាហ៍បានធ្វើឲ្យមានចរន្តវិនិយោគប្រុងប្រយ័ត្ន ដែលអាចឃើញតាមការកើនឡើងតម្លៃមាស និងភាគហ៊ុនអនាគតអាមេរិក ហើយវាបានប៉ះពាល់ដល់តម្លៃប្រេងឥន្ធនៈ។

ការសម្រេចពន្ធនេះបានបន្ថយការព្រួយបារម្ភកំពុងកើនឡើងអំពីជម្លោះយោធារវាងអាមេរិក និងអ៊ីរ៉ង់ ដែលធ្លាប់ជំរុញតម្លៃ Brent និង WTI កើនឡើងលើស 5% កាលពីសប្ដាហ៍មុន។

អ៊ីរ៉ង់ និងសហរដ្ឋអាមេរិក នឹងធ្វើកិច្ចពិភាក្សានុយក្លេអ៊ែរជុំទី 3 នៅថ្ងៃព្រហស្បតិ៍ ខាងមុខ នៅទីក្រុងហ្សឺណែវ ប្រទេសស្វីស នេះបើយោងតាមរដ្ឋមន្ត្រីការបរទេសអូម៉ង់ លោក Badr Albusaidi។

មន្ត្រីជាន់ខ្ពស់អ៊ីរ៉ង់ម្នាក់បានប្រាប់ Reuters ថា អ៊ីរ៉ង់បានបង្ហាញសញ្ញាថា ត្រៀមធ្វើសម្បទានលើកម្មវិធីនុយក្លេអ៊ែររបស់ខ្លួន ប្រសិនបើមានការលើកលែងទណ្ឌកម្ម និងការទទួលស្គាល់សិទ្ធិបន្ថែមអ៊ុយរ៉ាញ៉ូម។

ធនាគារ Goldman Sachs បានព្យាករណ៍ថា ទីផ្សារប្រេងពិភពលោកនឹងនៅសល់លើសតម្រូវការ នៅឆ្នាំ 2026 ប្រសិនបើគ្មានការរំខានផ្គត់ផ្គង់ពីអ៊ីរ៉ង់ ហើយបានបង្កើនការព្យាករណ៍តម្លៃ Brent និង WTI សម្រាប់ត្រីមាសទី 4 ឆ្នាំ 2026 ឡើង 6 ដុល្លារ ទៅ 60 និង 56 ដុល្លារ/បារ៉ែល តាមលំដាប់ ដោយយោងទៅលើស្តុកទាបនៅប្រទេស OECD។

ទោះជាយ៉ាងណា អ្នកវិភាគរបស់ Goldman Sachs បានព្រមានថា ប្រសិនបើមានការលើកលែងទណ្ឌកម្មលើអ៊ីរ៉ង់ និងរុស្ស៊ី អាចបង្កើនការផ្គត់ផ្គង់ក្នុងរយៈពេលវែង និងបង្កហានិភ័យធ្លាក់ចុះ 5 ទៅ 8 ដុល្លារ សម្រាប់តម្លៃត្រីមាសទី 4 ឆ្នាំ 2026៕