សារព័ត៌មាន នគរវត្ត តែងតែនាំមុខគេជានិច្ច
ប្រធានាធិបតីកូរ៉េខាងត្បូង Lee Jae Myung បានជួបពិភាក្សាកំពូលនៅទីក្រុងសេអ៊ូល នៅថ្ងៃចន្ទនេះ ជាមួយប្រធានាធិបតីប្រេស៊ីល Luiz Inácio Lula da Silva ដោយភាគីទាំងពីរបានឯកភាពពង្រីកកិច្ចសហប្រតិបត្តិការនៅវិស័យជាច្រើន រួមមាន ពាណិជ្ជកម្ម រ៉ែសំខាន់ បច្ចេកវិទ្យា និងវប្បធម៌។
មេដឹកនាំទាំងពីរមានគម្រោងលើកកម្ពស់ទំនាក់ទំនងទ្វេភាគីឲ្យក្លាយជាដៃគូយុទ្ធសាស្ត្រ និងធ្វើការរួមគ្នាដើម្បីគាំទ្រស្ថិរភាពនៅលើឧបទ្វីបកូរ៉េ។
ប្រធានាធិបតី Lee បានថ្លែងនៅក្នុងសន្និសីទសារព័ត៌មានរួមថា៖«សន្តិភាព ដែលកើតឡើងក្នុងលក្ខខណ្ឌដែលមិនចាំបាច់មានជម្លោះ គឺជាទម្រង់សន្តិសុខដ៏រឹងមាំបំផុត»។
មេដឹកនាំទាំងពីរបានចូលរួមមើលការចុះហត្ថលេខាលើអនុស្សារណៈយោគយល់ (MOU) ចំនួន 10 ដែលគ្របដណ្តប់លើវិស័យពាណិជ្ជកម្ម និងគោលនយោបាយឧស្សាហកម្ម រ៉ែស្នូល សេដ្ឋកិច្ចឌីជីថលរួមទាំង AI កសិកម្ម សុខាភិបាល និងជីវបច្ចេកវិទ្យា ការផ្លាស់ប្តូរអាជីវកម្មខ្នាតតូច និងកិច្ចសហការការពារអំពើឧក្រិដ្ឋកម្មអ៊ីនធឺណិត គ្រឿងញៀន និងហានិភ័យឆ្លងដែនផ្សេងៗ។
មុននេះ លោក Lee បានឲ្យដឹងថា ភាគីទាំងពីរបានអនុម័តផែនការសកម្មភាពរយៈពេល 4 ឆ្នាំ ដើម្បីកំណត់ជំហានជាក់ស្តែងសម្រាប់ពង្រីកកិច្ចសហប្រតិបត្តិការ ពីរ៉ែយុទ្ធសាស្ត្រ ដល់ឧស្សាហកម្មការពារ និងអវកាស ព្រមទាំងសន្តិសុខស្បៀងអាហារ។
ប្រេស៊ីល គឺជាដៃគូពាណិជ្ជកម្មធំបំផុតរបស់កូរ៉េខាងត្បូងនៅអាមេរិកខាងត្បូង ដូច្នេះកិច្ចសហប្រតិបត្តិការសេដ្ឋកិច្ចគឺជាចំណុចសំខាន់ក្នុងរបៀបវារៈ៕
