សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង៖ លោក សរ សុពុត្រា អភិបាល នៃគណៈអភិបាលខេត្តស្ទឹងត្រែង នៅថ្ងៃទី១៧ ខែមីនា ឆ្នាំ២០២៦ បានបញ្ជាក់ថា សត្វផ្សោតកំពុងត្រូវបានអភិរក្សដោយការយកចិត្តទុកដាក់ខ្ពស់ពីមន្ត្រីជំនាញ។
ការថ្លែងរបស់លោកបែបនេះ បានធ្វើឡើងក្នុងកិច្ចសម្ភាសន៍ស្ដីពីសក្ដានុពល និងការអភិវឌ្ឍខេត្តស្ទឹងត្រែង ដែលសហការរៀបចំជាមួយក្លឹបអ្នកកាសែតកម្ពុជា ដោយមានលោក ពុយ គា ជាអ្នកដឹកនាំដោយផ្ទាល់។
លោក សរ សុពុត្រា បានមានប្រសាសន៍ថា សម្រាប់ឆ្នាំ២០២៦នេះ សត្វផ្សោតក្នុងខេត្តស្ទឹងត្រែងមិនមានការកើនឡើងក៏ពិតមែន តែក៏មិនមានការបាត់បង់នោះដែរ ដោយសារក្រុមឆ្មាំទន្លេបានខិតខំប្រឹងប្រែងតាមដានដោយយកចិត្តទុកដាក់។
គួរជម្រាបថា គិតត្រឹមឆ្នាំ២០២៦នេះ សត្វផ្សោតក្នុងប្រទេសកម្ពុជាមានចំនួន ១១៣ក្បាល ក្រោមកិច្ចសហការយ៉ាងជិតស្និទ្ធរវាងក្រសួងកសិកម្មជាសេនាធិការរាជរដ្ឋាភិបាល ជាមួយស្ថាប័នពាក់ព័ន្ធ រដ្ឋបាលខេត្តក្រចេះនិងស្ទឹងត្រែង អាជ្ញាធរខេត្ត និងដៃគូអភិវឌ្ឍន៍នានា ជាពិសេសអង្គការ WWF ធ្វើការក្នុងគោលដៅរួមគ្នាដើម្បីចាត់វិធានការពង្រឹងកិច្ចការពារ ដោយបានបង្កើតក្រុមឆ្មាំទន្លេចំនួន៧២រូប យាមល្បាតជាប្រចាំនៅតំបន់អភិរក្សសត្វផ្សោត។
ក្រោមការដឹកនាំពីសំណាក់ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ព្រមទាំងរដ្ឋបាលជលផល ប្តេជ្ញាពង្រឹងការអនុវត្តច្បាប់ លុបបំបាត់ការនេសាទខុសច្បាប់ និងលើកកម្ពស់ការគ្រប់គ្រងទន្លេប្រកបដោយប្រសិទ្ធភាពខ្ពស់ ដើម្បីធានាឱ្យបាននូវការរស់រានមានជីវិតរបស់សត្វផ្សោតទន្លេមេគង្គ និងបង្កើនផលស្តុកត្រីក្នុងជម្រកធម្មជាតិ៕
ដោយ៖ តារា
