សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានស្រវឹងស្រាឡើងជោក ហើយបានជិះម៉ូតូរេចង្កូតពេញផ្លូវ ក៏ជ្រុលទៅបុកនឹងក្បាលនាគពុះចែកផ្លូវពេញទំហឹង បណ្តាលឲ្យរងរបួសបែកក្បាលសន្លប់ ស្ដូកស្ដឹងនៅនឹងកន្លែង ។
ហេតុការណ៍នេះ បានកើតឡើងនៅវេលាម៉ោង១០និង២០នាទីយប់ ថ្ងៃ១៦ ខែតុលា ឆ្នាំ២០១៦ ទុលមុខនឹងស្ថានទូតឡាវ ផ្លូវម៉ៅសេទុង សង្កាត់ទន្លេ បាសាក់ ខណ្ឌចំការមន ហើយជនរងគ្រោះ ដែលជួបហេតុការណ៍គ្រោះថ្នាក់ដោយខ្លួនឯងនោះមិន បានស្គាល់អត្តសញ្ញាណ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេបាឃើញ បុរសម្នាក់ អាយុប្រហែល២៥ឆ្នាំ មិនដឹងថា ចេញពីផឹកស៊ីនៅកន្លែងណានោះទេ គឺជិះម៉ូតូម៉ាក ឃ្លីក ពណ៌លឿង ពាក់ស្លាកលេខ ភ្នំពេញ ១AG.៤៨៩០ បានធ្វើដំណើរតាមផ្លូវ ម៉ៅសេទុង ក្នុងទិសដៅពីលិច ទៅកើត ក្នុងល្បឿនលឿន និងស្រវឹងស្រាទោទន់ផងនោះ ខណៈមកដល់ចំណុចកើតហេតុ ក៏ស្រាប់តែរេចង្កូត ទៅបុកនឹងក្បាលនាគពុះចែកផ្លូវពេញទំហឹង បណ្តាលឲ្យក្បាលនាគវៀចខុសទ្រង់ទ្រាយដើម អស់មួយកង់ ។ ដោយឡែក អ្នកជិះម៉ូតូរងរបួសបែកក្បាលសន្លប់ ស្ដូកស្ដឹងនៅនឹងកន្លែងកើតហេតុតែម្ដង ។
បន្ទាប់ក្រោយមកជនរងគ្រោះ ក៏ត្រូវបានរថយន្តសង្គ្រោះដឹកយកទៅសង្គ្រោះនៅគ្លីនិកឯកជន ហុង ហាក់ ចំណែកម៉ូតូរងកាខូចខាតខ្ទេចមួយកំណាត់ខាងមុខ ។
ក្រោយពេលកើតហេតុ ម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុក នៅអធិការដ្ឋាននគរបាលខណ្ឌចំការមន ដើម្បីរង់ចាំម្ចាស់យកឯកសារមក និងប្រគល់ឲ្យម្ចាស់វិញ ៕ ជីម ភារ៉ា ដង្កោ
