សង្ស័យបើកបរក្នុងល្បឿនលឿនខ្វះការប្រុងប្រយ័ត្នជ្រុលទៅបុកខឿនទ្រូងផ្លូវបណ្តាលឲ្យបុរសម្នាក់រងរបួសធ្ងន់

   ភ្នំពេញ÷ បុរសម្នាក់បានរងរបួសធ្ងន់ខណៈជិះម៉ូតូ១គ្រឿងជ្រុលទៅបុកខឿនទ្រូងផ្លូវដែលគេសង្ស័យថាអ្នកបើកបរបើកក្នុងល្បឿនលឿនហើយខ្វះការប្រុងប្រយ័ត្ន។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២៣និង០២នាទីយប់ថ្ងៃទី០៤ ខែឧសភា ឆ្នាំ២០២៦ នៅតាមបណ្តោយផ្លូវបេតុងត្រង់ចំណុចភ្លើងស្តុបបុរីអង្គរក្នុងសង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ។

ប្រភពីកន្លែងកើតហេតុបានឲ្យដឹងថានៅមុនពេលកើតហេតុគេឃើញបុរសខាងលើជិះម៉ូតូ១គ្រឿងម៉ាក ATV ពាក់ស្លាកលេខភ្នំពេញ 1MD 9986 បើកបរតាមបណ្តោយផ្លូវបេតុង លុះមកដល់ចំណុចកើតហេតុក៏ជ្រុលទៅបុកនឹងខឿនទ្រូងផ្លូវបណ្តាលឲ្យដួលរងរបួសធ្ងន់តែម្តង។

   ក្រោយកើតហេតុជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យ  ចំណែកម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលដើម្បីរង់ចាំម្ចាស់ទៅទទួលយកនៅពេលក្រោយ៕

ដោយ÷ចន្ទ លីហ្សា