សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់បានចូលទៅលួចស្រានៅក្នុងផ្សារទំនើបឡាក់គី បានចំនួនពីរដបដាក់ចូលក្នុងកាបូបស្ពាយត្រូវបុគ្គលិកនិងសុន្តិសុខឃើញក៏នាំគ្នាចាប់ប្រគល់អោយសមត្ថកិច្ច។
ហេតុការណ៍នេះ បានកើតឡើងនៅវេលាម៉ោង២០និង៣០នាទីយប់ថ្ងៃទី២៤ ខែតុលា ឆ្នាំ២០១៦ នៅចំណុចផ្សារទំនើបឡាក់គី តាមបណ្ដោយមហាវិថីព្រះសីហនុ ក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ។
ជនសង្ស័យដែលត្រូវឃាត់ខ្លួនមានឈ្មោះ នៅ គ្រុយ ភេទប្រុសអាយុ២៤ឆ្នាំ ស្នាក់នៅសង្កាត់ផ្សាថ្មី ២ ខណ្ឌដូនពេញ មានមុខរបរមិនពិតប្រាកដ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគឺជនសង្ស័យបានដើរចូលទៅក្នុងផ្សារដោយមានស្ពាយកាបូបមួយហើយបានធ្វើសកម្មភាពលួចស្រាចំនួនពីរដបដាក់ក្នុងកាបូបបំណងយកចេញក្រៅ តែត្រូវបុគ្គលិកនិងសន្តិសុខឃើញក៏នាំគ្នាចាប់តែម្ដងទៅ។
ប្រភពបានបន្តថា ពេលដែលនាំគ្នាចាប់នោះ ជនសង្ស័យខាងលើបានវាយទៅលើសន្តិសុខម្នាក់និងបុគ្គលិកម្នាក់ទៀតបណ្ដាលអោយរងរបួសស្រាលផងដែរ។
ក្រោយមកទើបបុគ្គលិករាយការណ៍ទៅសមត្ថកិច្ចប៉ុស្ដិ៍បឹងកេងកង១ ដើម្បីអោយសមត្ថកិច្ចទៅយកជនសង្ស័យយកមកប៉ុស្ដិ៍ដើម្បីចាត់ការតាមនិតិវិធីច្បាប់ ៕ ជីម ភារ៉ា ដង្កោ
