សារព័ត៌មាន នគរវត្ត តែងតែនាំមុខគេជានិច្ច
ក្រុមជម្រើសជាតិអង់គ្លេសបានយកឈ្នះក្រុមបារាំងក្នុងលទ្ធផល ៦-៤ នៅការប្រកួតដណ្តើមចំណាត់ថ្នាក់លេខ៣ នៃព្រឹត្តិការណ៍ FIFA World Cup កាលពីថ្ងៃសៅរ៍ (១៨ កក្កដា) ខណៈ Kylian Mbappe បានក្លាយជាកីឡាករដែលស៊ុតបញ្ចូលទីច្រើនជាងគេបំផុតក្នុងប្រវត្តិសាស្ត្រ World Cup។
Bukayo Saka រកបាន Hat-trick ខណៈ Jude Bellingham ក្លាយជាកីឡាករអង់គ្លេសដំបូងគេដែលស៊ុតបាន ៧ គ្រាប់ក្នុង World Cup តែមួយ ក្នុងការប្រកួតដ៏រំភើប និងមានគ្រាប់បាល់ដល់ទៅ ១០ គ្រាប់។
ទោះបីការប្រកួតពោរពេញដោយភាពសប្បាយរីករាយក៏ដោយ ក្រុមទាំងពីរនឹងត្រឡប់ទៅផ្ទះជាមួយការខកចិត្ត បន្ទាប់ពីបរាជ័យនៅវគ្គពាក់កណ្តាលផ្តាច់ព្រ័ត្រ។ បារាំងចាញ់អេស្ប៉ាញ ខណៈអង់គ្លេសត្រូវអាហ្សង់ទីនវាយបកយកឈ្នះនៅនាទីចុងក្រោយ។
ក្រោយការប្រកួត Saka បាននិយាយថា ការយកឈ្នះបារាំងគឺជា “លទ្ធផលដ៏អស្ចារ្យ” ប៉ុន្តែបានទទួលស្គាល់ថា ការចាញ់អាហ្សង់ទីន “ឈឺចាប់ខ្លាំងណាស់”។ «ពេលអ្នកចាញ់ តែងតែមានការរិះគន់។ ពេលអ្នកឈ្នះ ក៏មានការសរសើរដែរ។ អ្វីសំខាន់គឺរបៀបដែលអ្នកឆ្លើយតប។ ថ្ងៃនេះយើងបញ្ចប់ការប្រកួតបានល្អ ហើយនោះជាអ្វីដែលយើងអាចធ្វើបាន»។
ដោយសារអាកាសធាតុក្តៅខ្លាំងនៅទីក្រុង Miami គ្រូបង្វឹកទាំងពីរបានផ្លាស់ប្តូរកីឡាករជាច្រើន ដោយទុកតារាឆ្នើមមួយចំនួននៅកៅអីបម្រុង។
អង់គ្លេសនាំមុខតាំងពីនាទីទី៣ តាមរយៈការស៊ុតពីចម្ងាយរបស់ Declan Rice មុនពេល Ezri Konsa តែតបញ្ចូលទីធ្វើឱ្យលទ្ធផលក្លាយជា ២-០។
បន្ទាប់មក Bukayo Saka រកបានពីរគ្រាប់បន្ថែម មួយនៅចុងតង់ទី១ ធ្វើឱ្យអង់គ្លេសនាំមុខដល់ ៤-០។
គ្រូបង្វឹកបារាំង Didier Deschamps ដែលដឹកនាំក្រុមជាលើកចុងក្រោយ បានហៅការលេងនៅតង់ទី១ថា «អាក្រក់បំផុត» ហើយជំរុញឱ្យកីឡាករបង្ហាញមោទនភាព។ គាត់បានប្តូរកីឡាករជាច្រើននៅដើមតង់ទី២ រួមមាន Ousmane Dembele និង Bradley Barcola។
ការផ្លាស់ប្តូរនេះទទួលបានលទ្ធផលភ្លាមៗ ដោយ Mbappe ស៊ុតបានគ្រាប់ទី៩របស់ខ្លួនក្នុងការប្រកួតនេះ និងឡើងឈរកំពូលតារាងអ្នកស៊ុតបញ្ចូលទីច្រើនជាងគេ (Golden Boot) លើស Lionel Messi។
Barcola បន្ថែមមួយគ្រាប់ទៀត ហើយ Mbappe រកបានគ្រាប់ទី២របស់ខ្លួន ដោយក្លាយជាអ្នកស៊ុតបញ្ចូលទីច្រើនជាងគេបំផុតក្នុងប្រវត្តិសាស្ត្រ World Cup ជាមួយ ២២ គ្រាប់។
បារាំងបានខកខានឱកាសជាច្រើន មុនពេលអង់គ្លេសទទួលបានបាល់ពិន័យ ១១ ម៉ែត្រ ក្រោយ Malo Gusto បង្កកំហុសលើ Djed Spence។ កីឡាករបម្រុង Jude Bellingham បានប្រគល់បាល់ឱ្យ Saka ស៊ុតចូល ដើម្បីបំពេញ Hat-trick របស់ខ្លួន។
នៅចុងការប្រកួត Dembele ស៊ុតបានគ្រាប់ទី៤ឱ្យបារាំង ប៉ុន្តែ Bellingham បានស៊ុតគ្រាប់ទី៦ឱ្យអង់គ្លេស ដោយការស៊ុតដ៏អស្ចារ្យ បញ្ចប់ការប្រកួតក្នុងលទ្ធផល ៦-៤។
ការបញ្ចប់នៅចំណាត់ថ្នាក់លេខ៣ គឺជាលទ្ធផលល្អបំផុតរបស់អង់គ្លេសនៅ World Cup ចាប់តាំងពីពួកគេលើកពានឆ្នាំ 1966 ទោះបីពួកគេនៅតែមានការសោកស្តាយចំពោះការចាញ់អាហ្សង់ទីននៅវគ្គពាក់កណ្តាលផ្តាច់ព្រ័ត្រក៏ដោយ។
សម្រាប់ Didier Deschamps នេះគឺជាការបញ្ចប់អាជីពជាគ្រូបង្វឹកបារាំង បន្ទាប់ពីដឹកនាំក្រុមឈ្នះ World Cup ឆ្នាំ 2018 និងបានជើងឯករងនៅឆ្នាំ 2022។
ចំណែកការប្រកួតផ្តាច់ព្រ័ត្រ World Cup ឆ្នាំ 2026 នឹងប្រព្រឹត្តទៅនៅទីក្រុង East Rutherford រដ្ឋ New Jersey រវាង អាហ្សង់ទីន និង អេស្ប៉ាញ នៅថ្ងៃអាទិត្យ៕
ដោយ៖ ភារៈ
