សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ទារិកាម្នាក់ដែលទើបនឹងកើត ត្រូវបានប្រជាពលរដ្ឋប្រទះឃើញ ប្លុងដាក់ចោលនៅស្មៅ ក្បែរចេតិយក្នុងបរិវេណវត្តកំបូល ភូមិកំបូល សង្កាត់កំបូល ខណ្ឌកំបូល រាជធានីភ្នំពេញ កាលពីយប់ថ្ងៃទី១៨ ខែសីហា ឆ្នាំ២០២៦ ផ្អើលពលរដ្ឋ អាជ្ញាធរ សមត្ថកិច្ចចុះទៅពិនិត្យ និងយកទៅសង្គ្រោះ ពិនិត្យតាមដានសុខភាពនៅមន្ទីរពេទ្យ។
តាមប្រជាពលរដ្ឋបានឱ្យដឹងថា នៅវេលាយប់ទៅហើយ ស្រាប់តែឮសូរសំឡេងកូនក្មេងយំ ក្បែរចេតិយ មានអារម្មណ៍បែបអរូបិយ គិតថាខ្មោចលង តែអាងគ្នាច្រើនហៅនាំគ្នារកមើលតាមសំឡេង ស្រាប់តែប្រទះឃើញទារិកាម្នាក់ ត្រូវបានម្តាយ ឬជនមិនស្គាល់មុខ យកទៅដាក់ប្លុងចោល កាន់តែផ្អើលឆោឡោ មិនដឹងថាម្តាយរូបណាអ្វីក៏ចិត្តដាច់ម្ល៉េះ បង្កើតកូនមកហើយ យកទៅចោលបែបនេះ ហើយគ្មានទាំងកន្សែង ក្រណាត់ ដណ្ដប់រាងកាយផង។
ក្រោយពីប្រទះឃើញ រាយការណ៍ទៅអាជ្ញាធរ សមត្ថកិច្ច ចុះទៅពិនិត្យ រួចហៅរថយន្ត និងក្រុមគ្រូពេទ្យបង្អែកបែកចាន ដោយមានការដឹកនាំពីលោកអធិការខណ្ឌកំបូល យកទារិកាទៅសង្គ្រោះ និងពិនិត្យតាមដាន ថែទាំសុខភាពនៅមន្ទីរពេទ្យកុមារជាតិ។
ករណីខាងលើនេះផងដែរ ត្រូវបានបងប្អូនប្រជាពលរដ្ឋ រិះគន់ផងដែរដល់មាតា ដែលមានចិត្តខ្មៅអប្រិយ ហ៊ានបោះបង់ដល់ម្លឹង។ រីឯអាជ្ញាធរ សមត្ថកិច្ច បន្តធ្វើការស្រាវជ្រាវ ស្វែងរកម្តាយទារិកាអភ័ព្វ ៕
ដោយ៖ ជ្រោយពេជ្រ
