សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ÷កម្លាំងអធិការដ្ឋាននគរបាលស្រុកព្រៃនប់ សហការជាមួយកម្លាំងអធិការដ្ឋាននគរបាលក្រុងកំពង់សោម ចុះបង្រ្កាបអំពើលួចម៉ូតូដោយឃាត់ខ្លួនជនសង្ស័យម្នាក់។
នគរបាលបានឲ្យដឹងថា កាលពីថ្ងៃទី ២៧ ខែសីហា ឆ្នាំ២០២៦ វេលាម៉ោង១៣ និង៣០នាទីរសៀល នៅចំណុចដើមឈើចាំស្នេហ៍ ស្ថិតនៅភូមិគគី សង្កាត់បិតត្រាំង ក្រុងកំពង់សោម ខេត្តព្រះសីហនុ មានករណីលួចមានស្ថានទម្ងន់ទោស មួយកើតឡើងបង្កដោយជនសង្ស័យ ១នាក់ មិនស្គាល់អត្តសញ្ញាណបានធ្វើ សកម្មភាពកាច់បំបែកសោក ម៉ូតូ១គ្រឿងម៉ាកហុងដាឌ្រីម ពណ៌ខ្មៅ សេរីឆ្នាំ២០២៦ ពាក់ផ្លាកលេខ ភ្នំពេញ 1MT.8459 រួចជិះយកទៅបាត់ ។
បន្ទាប់ពីទទួលបានព័ត៌មាន អនុវត្តតាមអនុសាសន៍ដឹក នាំនិងការចង្អុលណែនាំជាប្រចាំរបស់ ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ និងតាមការណែនាំពីលោកឧត្តមសេនីយ៍ត្រី ណុប បញ្ញា ស្នងការរងទទួលផែនការងារព្រហ្មទណ្ឌ ផ្នែកជំនាញអធិការដ្ឋាននគរបាលក្រុងកំពង់សោម សហការជាមួយកម្លាំងអធិការដ្ឋាននគរបាលស្រុកព្រៃនប់ស្រាវជ្រាវ និងបានឃាត់ខ្លួនជនសង្ស័យ ១នាក់រួមទាំងវត្ថុតាងនៅចំណុចចំការដូងប្រេង ក្នុងឃុំតានៃ ស្រុកព្រៃនប់ ខេត្តព្រះសីហនុ ។
ជនសង្ស័យ ឈ្មោះ អួន វីរៈ (ហៅភ័ស ) ភេទប្រុស អាយុ៤៤ឆ្នាំ (មុខរបរមិនពិតប្រាកដ) ស្រុកកំណើតភូមិស្ពានថ្ម ឃុំបារាយណ៍ ស្រុកបារាយណ៍ ខេត្តកំពង់ធំ។ ស្នាក់នៅភូមិ បឹងឈូក ឃុំកណ្តៀង ស្រុកកណ្តៀង ខេត្តពោធិ៍សាតដកហូត វត្តុតាងដកហូតរួមមាន៖ ម៉ូតូ១ គ្រឿងម៉ាកហុងដាឌ្រីម ពណ៌ខ្មៅ សេរី២០២៦ ពាក់ស្លាកលេខ ភ្នំពេញ 1MT.8459 (ជា ផលអំពើលួច) និងឧបករណ៍ និងសម្ភារៈរបស់ជនសង្ស័យរួមមាន( សោកាច់ចំនួន ៣គ្រាប់ កូនសោម៉ូតូចំនួន ២គ្រាប់ សោស៊ាអក្សLលេខ8 ចំនួន ១ដើម តួណឺវីសចំនួន ១ដើម ដង្កាប់ចំនួន ១ដើមដុយសម្រាប់តភ្លើងចំនួន ២គ្រាប់ ផ្លាក់លេខចំនួន ១សន្លឹក លេខភ្នំពេញ 1GM.4391និង ទូរស័ព្ទចំនួន ២គ្រឿង។
បច្ចុប្បន្នជនសង្ស័យនិងវត្ថតាង ត្រូវបានអធិការដ្ឋាននគរបាលក្រុងកំពង់សោម កសាងសំណុំរឿង បញ្ជូនទៅការយាល័យព្រហ្មទណ្ឌដើម្បីបន្តតាមនីតិវិធី។ ចំពោះសម្ភារៈបាត់បង់ ដោយបានការអនុញ្ញាតពីតំណាងអយ្យការ គឺបានប្រគល់ជូនជនរងគ្រោះវិញ៕
