ឃាត់ខ្លួនជនសង្ស័យ២នាក់ពាក់ព័ន្ធថ្នាំញៀន១កញ្ចប់

ភ្នំពេញ ៖ យុវជន២នាក់ ត្រូវនគរបាលប៉ុស្តិ៍ទឹកថ្លាឃាត់ខ្លួន ពេលឆែកឆេររកឃើញថ្នាំញៀន១កញ្ចប់នៅក្នុងខ្លួនរបស់ពួកគេ កាលពីវេលាម៉ោង ២និង៣០នាទីយប់រំលងអធ្រាត្រ ឈានចូលថ្ងៃទី៥ ខែវិច្ចិកា ឆ្នាំ២០១៦ នៅចំណុចមុខស្ថានីយប្រេងឥន្ធនះ តេលាតាមបណ្ដោយផ្លូវ២០០៤ស្ថិតក្នុងសង្កាត់ទឹកថ្លា ខណ្ឌសែនសុខ ។

យុវជនពីរនាក់ខាងលើទី១ មានឈ្មោះ ហង ធឿន ភេទប្រុស អាយុ២៣ មុខរបរ រត់តុ ស្នាក់នៅផ្ទះជួលម្ដុំផ្លូវមៃដា សង្កាត់ទឹកថ្លា ខណ្ឌសែនសុខ ស្រុកកំណើតភូមិបាធាតុ ឃុំបាធាតុ ស្រុកកំពង់ត្របែក ខេត្តព្រៃវែង និងទី២ ឈ្មោះ ថៃ ប៉ង់ ភេទប្រុស អាយុ២៣ឆ្នាំ មុខរបរធ្វើការក្នុងភោជនីយដ្ឋានរាត្រីទឹកឃ្មុំ ស្នាក់នៅផ្ទះជួលស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ ស្រុកកំណើតភូមិ អូរដំរី ស្រុកម៉ាលៃ ខេត្តបន្ទាយមានជ័យ។

តាមប្រភពពីសមត្ថកិច្ចបានប្រាប់អោយដឹងថា មុនពេលឃាត់ខ្លួន ខណៈកម្លាំងអន្តរាគមន៍ពិសេសខណ្ឌសែនសុខបានល្បាតក្នុងមូលដ្ឋានឃើញជនសង្ស័យ២នាក់បានជិះម៉ូតូមួយគ្រឿងម៉ាកស្មាសវី ពណ៌ខ្មៅ ពាក់ស្លាកលេខ កណ្ដាល ១N ៤៩៥៤ ជិះម៉ូតូក្នុងលក្ខណៈសង្ស័យ ហើយក៏ជិះដេញតាមហើយឃាត់ដើម្បីឆែកឆេរ ពេលនោះស្រាប់តែប្រទះឃើញកញ្ចប់ថ្នាំញៀនមួយកញ្ចប់នៅលើខ្លួនយុវជនម្នាក់ ក្នុងចំណោមពីរនាក់ក្រោយមកកម្លាំងសមត្ថកិច្ច ក៏បានឃាត់ជនសង្ស័យខាងលើយកទៅសាកសួរនៅប៉ុស្ដិ៍នគរបាលរដ្ឋាបាលទឹកថ្លា។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ថ្នាំញៀននេះពិតជារបស់ខ្លួនពិតប្រាកដមែន ហើយពួកគេបានទិញពីម្តុំមុខពេទ្យលោកសង្ឃដើម្បីយកទៅប្រើប្រាស់ ។

បច្ចុប្បន្នជនសង្ស័យទាំង២នាក់ រួមនឹងវត្ថុតាងកំពុងកសាងសំណុំរឿងបញ្ជូនទៅអធិការដ្ឋានខណ្ឌសែនសុខរង់ចាំការចាត់ការតាមនីតិវិធី ៕ តុង សីហា