សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យ២នាក់ រួមនឹងថ្នាំញៀនចំនួន២កញ្ចប់តូចត្រូវបាននគរបាលប៉ុស្តិ៍ទឹកថ្លាឃាត់ខ្លួន ខណៈឆែកឆេររកឃើញលាក់ទុកគ្រឿងញៀននៅជាប់ខ្លួន កាលពីវេលាម៉ោង៩និង៣៥នាទីយប់ ថ្ងៃទី១៦ ខែវិច្ឆិកា ឆ្នាំ២០១៦ នៅចំណុចក្បែរស្ពានអាកាស៧មករា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
សមត្ថកិច្ចប្រាប់ឲ្យដឹងថា បានប្រទះឃើញជនសង្ស័យ២នាក់ ជិះម៉ូតូមួយគ្រឿង ម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ ១AI ០៨៦២ ដោយមានការសង្ស័យ សមត្ថកិច្ចក៏បានឃាត់ឲ្យឈប់ និងឆែកឆេរ ត្រួតពិនិត្យ ពេលនោះប្រទះឃើញថ្នាំញៀន២កញ្ចប់នៅជាប់ខ្លួន ទើបនាំយកទៅសាកសួរនៅប៉ុស្ដិ៍នគរបាលរដ្ឋាបាលទឹកថ្លា។
ប្រភពបន្តថា ជនសង្ស័យ ឈ្មោះ ១ ណេរ ដេត ភេទប្រុស អាយុ២៣ឆ្នាំ មុខរបរកម្មករសំណង់ ស្នាក់នៅផ្ទះជួល ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ និងមានស្រុកកំណើត ភូមិផ្អាវ ឃុំផ្អាវ ស្រុកបាធាយ ខេត្តកំពងចាម និង ទី២ ឈ្មោះ ចន័្ទ អឿងស្រ៊ុន ភេទប្រុស អាយុ២៣ឆ្នាំ មុខរបរបើករថយន្តដឹកដី ស្រុកកំណើតជាមួយបុរសខាងលើ ។
បចុប្បន្នជនសង្ស័យត្រូវកសាងសំណុំរឿងបញ្ជូនទៅអធិការដ្ឋានខណ្ឌសែនសុខការចាត់ការតាមនីតិវិធី ៕ តុង សីហា
