សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ៖ កម្លាំងសមត្ថកិច្ចចម្រុះបានស្ទាក់ចាប់រថយន្តមួយគ្រឿងដែលឈ្មួញ រកល្បិចថ្មីយកឈើគ្រញូងលាក់ទុកក្នុង កាបូម៉ាស៊ីនហើយការចាប់រថយន្តដឹកឈើគ្រញូងនេះ ស្ថិតនៅភូមិគោភជន្លងឃុំ-ស្រុក ជាំក្សាន្ត ខេត្តព្រះវិហារកាលពីវេលារំលងអធ្រាត្រឈានចូលថ្ងៃទី២៦ខែវិច្ឆិកា ឆ្នាំ២០១៦។
មន្ត្រីចុះបង្រ្កាបបានឲ្យដឹងថាប្រតិបត្តិការចុះបង្ក្រាបនោះដឹកនាំដោយលោកនាយផ្នែក រដ្ឋបាលព្រៃឈើជាំក្សាន្តសហការជាមួយ នឹងមេព្រៃសង្កាត់រំដោះស្រែនិង ព្រីងធំចាប់បានរថយន្តដឹកគ្រញូងមួយ គ្រឿងរកឃើញឈើគ្រញូងចំនួន៣៥ដុំស្មើនឹង១៣៥គីឡូក្រាម ។
មន្រ្តីមេព្រៃស្រុកជាំក្សាន្តបានឲ្យដឹងថាសព្វថ្ងៃឈ្មួញដឹកឈើគ្រញូងមានល្បិច ខ្ពស់ណាស់ហើយឈ្មួញទាំងនោះបានរកគ្រប់ល្បិចយកឈើគ្រញូងទៅដាក់ក្នុង កាបូម៉ាស៊ីនរថយន្តតែទោះយ៉ាងណាមិន អាចបិទបាំងភ្នែកសមត្ថកិច្ចបានឡើយ ។
សូមបញ្ជាក់ថាបច្ចុប្បន្នសកម្មភាពដឹកឈើក្រញូងបានកម្រើកឡើងវិញបន្ទាប់ពីស្ងាត់មួយរយៈពេលខ្លី ។ ក្នុងនោះឈ្មួញ បានប្រើប្រាស់រថយន្តទំនើបៗដឹកគ្រញូងមានដូចជា រថយន្តឡិចស៊ីស៣៣០ រថយន្ត ឡិចស៊ីស៤៧០ និង៥៧០ជាដើម ។
កាលពីពេលថ្មីៗកន្លងទៅទៅក្រុមឈ្មួញរកស៊ីដឹកឈើប្រណីតបានប្រើគ្រប់មធ្យោ បាយក្នុងការដឹកជញ្ជូនឈើលាក់ក្នុងរថយន្ត ក្រុងដឹកអ្នកដំណើរក៏មានរថយន្តពេទ្យដឹក អ្នកជំងឺក៏មានរថយន្តដឹកប្រេងដឹកហ្គាស ក៏មាន ។ មិនតែប៉ុណ្ណោះ ក្រុមឈ្មួញនៅបាន យកឈើប្រណីតទៅចាក់ស៊ីម៉ងត៍ស្រោបពីលើឈើធ្វើដូចជាសសរបុកគ្រឹះផ្ទះដើម្បី បំភាន់ភ្នែកសមត្ថកិច្ចក៏មានហើយនៅមានល្បិចកលមួយរយជំពូកទៀត ។ ក៏ប៉ន្តែទោះបី ជាក្រុមឈ្មួញ ទាំងនេះខំប្រឹងបំភាន់ភ្នែកប្រើល្បិចកលយ៉ាង ណាក៏ដោយក៏ គេចមិនរួច ពីសមត្ថកិច្ចដែរ លើកលែងតែសមត្ថកិច្ច និងមន្រ្តីជំនាញពាក់ព័ន្ធខ្លះមិនចាប់ ហើយលូក ដៃទទួលលុយប៉ុណ្ណោះ ៕ សហការី
