សម្តេចតេជោ ហ៊ុន សែន អញ្ជើញជួបឯកអគ្គរដ្ឋទូតជប៉ុនថ្មី

ភ្នំពេញ៖ នៅព្រឹកថ្ងៃទី០២ ខែធ្នូ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតអោយ លោក ហៃឌីហីសា ហូរិណុជិ (Hidehisa Horinouchi) ឯកអគ្គរដ្ឋទូតថ្មី នៃប្រទេសជប៉ុន ចូលជួបសំដែងការគួរសម និងពិភាក្សាការងារ នៅវិមានសន្តិភាព រាជធានីភ្នំពេញ។

សម្តេចតេជោ ហ៊ុន សែន បានស្វាគមន៍ និងអបអរសាទរចំពោះ លោក Hidehisa Horinouchi ដែលបានតែងតាំងជា ឯកអគ្គរដ្ឋទូតថ្មីជប៉ុនប្រចាំកម្ពុជា។ នៅក្នុងជំនួបព្រឹកមិញនេះ លោក Hidehisa Horinouchi បានវាយតម្លៃខ្ពស់ចំពោះការអភិវឌ្ឍយ៉ាងច្រើននៅកម្ពុជាក្រោមការដឹកនាំរបស់ សម្តេចតេជោ ហ៊ុន សែន។ ប្រទេសជប៉ុនបានចាត់ទុកកម្ពុជា ជាប្រទេសដៃគូរជាយុទ្ធសាស្ត្រដ៏សំខាន់។ លោក ឯកអគ្គរដ្ឋទូតថ្មីក៏បានសំណូមពរ សម្តេចតេជោនាយករដ្ឋមន្ត្រី និងរាជរដ្ឋាភិបាលកម្ពុជាបន្តសហការ គាំទ្រចំពោះបេសកកម្មការទូតរបស់លោកនៅកម្ពុជា។ លោកឯកអគ្គរាជទូតជប៉ុនថ្មី ក៏បានប្រាប់អំពីគម្រោងរៀបចំអញ្ជើញ ឯកឧត្តម ហ៊ុន ម៉ាណែត ទៅធ្វើទស្សនកិច្ចនៅប្រទេសជប៉ុននាពេលខាងមុខនេះផងដែរ។ ទន្ទឹមនឹងនេះ លោកអគ្គរដ្ឋទូតជប៉ុន បានមានប្រសាសន៍ជម្រាប សម្តេចតេជោ ថា ប្រទេសជប៉ុនរីករាយស្វាគមន៍ នឹងទទួលរ៉ាប់រងរៀបចំទាំងអស់ចំពោះការអញ្ជើញទៅបំពេញទស្សនៈកិច្ចជាឯកជនរបស់ សម្តេចតេជោ និងក្រុមគ្រួសារនៅប្រទេសជប៉ុនក្នុងពេលឆាប់ៗខាងមុខនេះទៀតផង។