សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្រ្តីជាកម្មករការីរោងចក្រម្នាក់ បានរងរបួសសន្លប់ស្តូកស្តឹង ខណៈប្តីមកពីផឹកសីុស្រវឹងហើយប្រើអំ អំពើហឹង្សា វាយប្រពន្ធបង្កការភ្ញាក់ផ្អើលដល់ពលរដ្ឋនាំគ្នាអន្តរាគមន៍ និងចាប់ឃាត់ខ្លួនជនបង្កនាំទៅឲ្យនគរបាល។
ហេតុការណ៍ខាងលើកើតឡើងកាលពីវេលាម៉ោង៤និង៣០នាទីរសៀល ថ្ងៃទី១១ ខែធ្នូ ឆ្នាំ២០១៦ ស្ថិតនៅក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ។
ស្ត្រីរងគ្រោះឈ្មោះ ឈយ សុខហេង អាយុ៣៧ឆ្នាំ មុខរបរ កម្មកររោងចក្រ មានកូនស្រី២នាក់នៅក្នុងបន្ទុកគ្រួសារ។ ចំណែកជនបង្កជាប្តីមានឈ្មោះ សេង ហុង អាយុ៣៦ឆ្នាំ មុខរបរមិនពិតប្រាកដ មានស្រុកកំណើតភូមិបេង ឃុំថ្មពូន ស្រុកកញ្ច្រៀច ខេត្តព្រៃវែង ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ បុរសជាប្តីបានទៅផឹកសីុជាមួយមិត្តភក្តិដោយប្រពន្ធនៅផ្ទះ ខណៈផឹកសីុរួច បុរសជាប្តីក៏បានមកផ្ទះវិញ ហើយបាននិយាយខ្លាំងៗដាក់ប្រពន្ធ និងដកខ្សែក្រវាត់វាយចំនួន៣ខ្សែក្រវាត់បណ្តាលឲ្យរងរបួសផ្នែកត្រង់ក្បាលសន្លប់ស្តូងស្តឹង ភ្លាមនោះក៏មានប្រជាពលរដ្ឋដែលនៅក្បែរនាំគ្នាចេញមកឃាត់ភ្លាមៗតែម្តង។
ក្រោយពេលកើតហេតុស្ត្រីរងគ្រោះត្រូវបានរថយន្តសង្គ្រោះអង្គភាពកងពលតូចលេខ៧០ដឹកយកទៅសង្គ្រោះនៅមន្ទីរពេទ្យព្រះកុសុមៈ ចំណែកបុរសជាប្តីត្រូវបានប្រជាពលរដ្ឋឃាត់ប្រគល់ឲ្យសមត្ថកិច្ច៕ សុខាសែនជ័យ
