សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ បុរសម្នាក់ត្រូវបានអាវុធហត្ថក្រុងប៉ោយប៉ែត ឃាត់ខ្លួនកាលពីរសៀលថ្ងៃទី១៩ ខែធ្នូ ឆ្នាំ២០១៦ នៅក្រុងប៉ោយប៉ែត ជាប់ពាក់ព័ន្ធនិងប្រើអំពើហិង្សាដោយចេតនា ទៅលើស្រ្តីម្នាក់ដែលជាសង្សាររបស់ខ្លួន ក្រោយស្រ្តីរងគ្រោះបានមកដាក់ពាក្យប្តឹងទៅលើជនដៃដល់ដែលបានវាយនាងបាក់ធ្មេញមុខបណ្តាលឱ្យរងរបួសយ៉ាងដំណំ ខណៈដែលនាងអង្គុយនិយាយាយសាសងជាមួយប្រុសផ្សេងក្នុងពិធីមង្គលការមួយកន្លែង កាលពីថ្ងៃទី១៨ ខែធ្នូ ឆ្នាំ២០១៦ ស្ថិតក្នុងភូមិប្រជាធម្ម សង្កាត់ផ្សារកណ្តាលក្រុងប៉ោយប៉ែត ខេត្តបន្ទាយមានជ័យ។
ជនដៃដល់មានឈ្មោះ ហេវ ផល្លី ភេទប្រុសអាយុ២៣ឆ្នាំ រស់នៅផ្ទះជួលក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។ ចំណែកនារីរងគ្រោះមានឈ្មោះប្រម ពិសី អាយុ១៩ឆ្នាំ ប្រកបមុខរបរកម្មកររោងចក្រ រស់នៅភូមិអូរប្ញស្សីក្រោម សង្កាត់ផ្សារកណ្តាល ក្រុងប៉ោយប៉ែត។
បើតាមប្រភពព័ត៌មានពីអាវុធហត្ថក្រុងប៉ោយប៉ែតឱ្យដឹងថា មូលហេតុដែលនាំឱ្យជនដៃដល់ជាសង្សារវាយស្រ្តីរងគ្រោះដោយសាររឿងប្រច័ណ្ឌ ជនដៃដល់ទូរស័ព្ទទៅនាងរងគ្រោះ មិនលើកទូរស័ព្ទ ហើយបានឃើញនាងអង្គុយនៅក្បែរប្រុសផ្សេង សាសងរឿងស្នេហា ។ ជនដៃដល់ឃើញបែបនោះទ្រាំពុំបានឈឺចិត្តក្តៅក្រហាយក៏ស្ទុះវាយនាងជាសង្សារជាច្រើនកណ្តាប់ដៃចំផ្ទៃមុខ និងមាត់បណ្តាលឱ្យបាក់ធ្មេញមុខចំនួន២ ផងដែរ ។
ជនដៃដល់ត្រូវបានចាប់បញ្ជូនមកកាន់ទីបញ្ជាការដ្ឋានកងរាជអាវុធហត្ថខេត្តបន្ទាយមានជ័យ ដើម្បីកសាងសំណុំរឿងបញ្ជូនទៅកាន់តុលាការយកទៅចាត់ការតាមផ្លូវច្បាប់៕ សំ វិច្ឆិកា
