សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កីឡាករប្រដាល់ក្លិបសុភា នូមានជ័យម្នាក់ស្រវឹងទឹកត្នោតជូរបែរចូលទៅដេកឱបកូនក្រមុំគេនាងដឹងខ្លួនឡើងស្រែកឆោឡោប្តឹងសមត្ថកិច្ចឲ្យឃាត់ខ្លួនពីបទបៀតបៀនកេរ្តិ៍ខ្មាសកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី៨ ខែមករា ឆ្នាំ២០១៧ នៅចំណុចផ្ទះ ជួលស្ថិតនៅភូមិវាលស្បូវ សង្កាត់វាលស្បូវ ខណ្ឌច្បារអំពៅ ។
ជនសង្ស័យដែលត្រូវឃាត់ខ្លួនឈ្មោះ ឌីន ឆៃណា ភេទប្រុស អាយុ២៥ឆ្នាំ ជាកីឡាករប្រដាល់នៅក្លិបសុភានូមានជ័យ ស្នាក់នៅភូមិកើតហេតុ មានស្រុកកំណើត នៅស្រុកអន្លង់វែង ខេត្តបន្ទាយមានជ័យ ។ ចំណែកជនរងគ្រោះ អាយុ១៦ឆ្នាំ មុខរបរ សិស្ស ស្នាក់នៅផ្ទះកើតហេតុ ស្ថិតនៅ សង្កាត់វាលស្បូវ ខណ្ឌច្បារអំពៅ ។
ម្ដាយជនរងគ្រោះឈ្មោះ អុីន រ៉ន អាយុ ៤៣ឆ្នាំ មុខរបរជាបុគ្គលិកអនាម័យក្រុម ហ៊ុនមួយបានប្រាប់ថា មុនពេលកើតហេតុកូនស្រីគាត់ដេកនៅផ្ទះជួលខាងលើជាមួយ ប្អូនស្រី៣នាក់ទៀត។ ក្រោយមកស្រាប់តែជនសង្ស័យជាកីឡាករប្រដាល់បានចូលទៅដេកឱបកូនស្រីច្បងរបស់គាត់ តែនាង មិនបានចាប់អារម្មរណ៍ទេ ទាល់តែពេល ភ្ញាក់ដឹងខ្លួនឡើងទៅបត់ជើងតូចមើលទៅមិនមែនបងប្អូនក៏ស្ទុះចេញស្រែកផ្អើលឆោឡោ ហើយកូនស្រីរត់ទៅគោះទ្វារបន្ទប់ គាត់ទើបគាត់ដឹង ហើយទៅប្ដឹងសមត្ថកិច្ចឲ្យជួយអន្តរាគមន៍ទៅចាប់ជនសង្ស័យ ដែលជាកីឡាករស្នាក់នៅក្នុងក្លិបសុភានូមានជ័យ ស្ថិតនៅក្នុងភូមិជាមួយគ្នា ។
លោក ម៉ៅ សឿត អធិការរងខណ្ឌច្បារអំពៅបានប្រាប់ថា ជនសង្ស័យជាកីឡាករ ប្រដាល់សេរីហ្វឹកហាត់នៅក្លិបសុភានូមានជ័យឡើងប្រកួតបានចំនួន១០ដងក្នុងនោះឈ្នះ៨ដង និងចាញ់២ដង។ មុនពេលកើតហេតុជនសង្ស័យបានទៅផឹកទឹកត្នោតជូរជាមួយមិត្តភក្តិ និងឪពុកមារបស់ជនរង គ្រោះសរុបទាំងអស់គ្នា៣នាក់អង្គុយផឹកនៅផ្ទះមិត្តភក្តិនៅក្បែរផ្ទះជនរងគ្រោះ ដោយផឹកទឹកត្នោតជូអស់២០លីត្ររហូតស្រវឹងជោកជាំ ហើយស្រាប់តែបាត់ឪពុកមារបស់ជនរងគ្រោះដែលអង្គុយជាមួយគ្នានោះ ទើបរូបគេដើររកក៏ចូលច្រឡំផ្ទះរបស់ជនរងគ្រោះ។ ពេលនោះជនសង្ស័យដើរ ចូលទៅស្រែកហៅឪពុកមា របស់ជនរង គ្រោះ តែអត់មានអ្នកឆ្លើយ ក៏ចូលទៅដេកឱបជនរងគ្រោះដែលកំពុងដេកជាមួយប្អូន៣នាក់។ លុះពេលជនរងគ្រោះដឹងខ្លួនក៏ស្រែកជេរ និងយករឿងហេតុប្រាប់ម្តាយ ហើយម្តាយក៏ប្ដឹងនគរបាលប៉ុស្តិ៍ឲ្យឃាត់ខ្លួនតែម្តង ។
ក្រោយពីសមត្ថកិច្ចហៅជនសង្ស័យទៅសួរនាំ ជនសង្ស័យបានសារភាព ដូចការចោទប្រកាន់ពិតប្រាកដមែនទើបនគរបាលប៉ុស្តិ៍វាលស្បូវ បានកសាងសំណុំរឿងបញ្ជូនទៅអធិការដ្ឋាន ខណ្ឌច្បារអំពៅដើម្បីចាត់ការតាមច្បាប់ ៕ សហការី
