ហុងដាគុប៥០បុកហុងដាគុប៩០របួសធ្ងន់២នាក់

ខេត្តស្វាយរៀង៖ បុរស២នាក់បានរងរបួសបែកក្បាលហូរឈាមសន្លប់ស្ដូកស្ដឹងនឹងកន្លែង ខណៈដែលជិះម៉ូតូបុកបញ្រាសគ្នាពេញទំហឹងកាលពីវេលាម៉ោង៦និង២០នាទល្ងាច ថ្ងៃទី២៤ ខែមករា ឆ្នាំ២០១៧ នៅលើផ្លូវក្រាលគ្រួសក្រហម ត្រង់ចំណុចភូមិស្មាច់ ឃុំក្រសាំង ស្រុករមាសហែក ខេត្តស្វាយរៀង។

សមត្ថកិច្ចនគរបាលបានអោយដឹងថា អ្នកបើកបរបង្កហេតុមានឈ្មោះ នួន សំអាន ភេទប្រុស អាយុ៤៥ឆ្នាំ មុខរបរកសិករមានទីលំនៅភូមិក្រសាំង ឃុំក្រសាំង ស្រុករមាសហែក ខេត្តស្វាយរៀង ខណៈម៉ូតូម៉ាក HONDA C50 ព៌ណទឹកបិក ស្លាកលេខគ្មាន ខូចខាតស្ទើរទាំងស្រុង។ រីឯភាគីរងគ្រោះមានឈ្មោះ ម៉ៅ ណាន ភេទប្រុស អាយុ36ឆ្នាំ មុខរបរកសិករ រស់នៅភូមិក្រសាំង ឃុំក្រសាំង ស្រុករមាសហែក ដោយជិះម៉ូតូម៉ាក HONDAC90 ព៌ណទឹកបិក ស្លាកលេខ ស្វាយរៀង1B.5409 ខូចខាតយ៉ាងដំណំ។

តាមសាក្សីបានអោយដឹងថា មុនកើតហេតុមានបុរសម្នាក់បានជិះម៉ូតូមួយគ្រឿងម៉ាកហុងដាគុប៥០ដោយធ្វើដំណើរពីលិចមកកើត ក្នុងល្បឿនលឿន ហើយក៏ទៅបុកនឹងម៉ូតូម៉ាកហុងដាសេ៩០ ដែលធ្វើដំណើរបញ្រាសគ្នា ខណៈមិនមានភ្លើងបំភ្លឺផ្លូវទាំង២បុកពេញទំហឹងលាន់សូរដូចរន្ទះបណ្ដាលអោយអ្នកភូមិនាំគ្នាភ្ញាក់ផ្អើលចេញមកមើល និងរាយការណ៍មកសមត្ថកិច្ចមូលដ្ឋានដឹកភាគីទាំងសងខាងមកកាន់មន្ទីរពេទ្យខេត្ត ប៉ុន្តែដោយរងរបួសធ្ងន់ ក៏បញ្ជូនបន្តទៅព្យាបាលរាជធានីភ្នំពេញទាំងយប់។

សមត្ថកិច្ចបន្តថា មូលហេតុៈ ដោយសារតែម៉ូតូទាំង២គ្រឿងពុំមានភ្លើងបំភ្លឺផ្លូវ ហើយអ្នកបើកម៉ូតូម៉ាក HONDA C50 បើកពុំប្រកាន់ស្ដាំទើបជួបគ្រោះថ្នាក់ចរាចរណ៏បែបនេះ។

វត្ថុតាងម៉ូតូទាំង២គ្រឿង រក្សាទុកនៅប៉ុស្តិ៍រដ្ឋបាលឃុំក្រសាំងដើម្បីចាត់ការបន្តតាមច្បាប់ ៕ យឹម សុថាន