រថយន្តក្រុមហ៊ុន រស្មីភ្នំពេញដឹកអ្នកដំណើរ បុកអ្នកជិះម៉ូតូស្លាប់ ២នាក់

ខេត្តពោធិ៍សាត់៖ រថយន្តក្រុមហ៊ុន រស្មីភ្នំពេញដឹកអ្នកដំណើរ បើកជែងបុកអ្នកជិះម៉ូតូស្លាប់ ០២នាក់ ភ្លាមៗនៅនិងកន្លែងកាលពីរំលងអធ្រាត្រ។

ហេតុការណ៍នេះបានកើតឡើងកាលពីវេលាម៉ោង១និង១០នាទីរំលងអធ្រាត្រ ឈានចូលថ្ងៃទី១៥ ខែកុម្ភៈ ឆ្នាំ២០១៧ នៅលើកំណាត់ផ្លូវជាតិលេខ ៥ ត្រង់ចន្លោះបង្គោលគីឡូម៉ែត្រលេខ ១៩៥-១៩៦ ស្ថិតក្នុងភូមិ-ឃុំស្នាមព្រះ ស្រុកបាកាន ខេត្តពោធិ៍សាត់។

ប្រភពព័ត៌មានពីនគរបាលផ្នែកចរាចរណ៍ នៃអធិការដ្ឋាននគរបាលស្រុកបាកានបានឲ្យដឹងថា ជនរងគ្រោះទី១ ឈ្មោះ ខៀវ ចេក ភេទប្រុស អាយុ ២៣ឆ្នាំ ជនជាតិខ្មែរ បច្ចុប្បន្នរស់នៅភូមិទួលខ្មែរ ឃុំស្នាមព្រះ ស្រុកបាកាន(បើកម៉ូតូ) និងទី២ ឈ្មោះ ភួង ខុម ភេទប្រុស អាយុ ៣២ឆ្នាំ ជនជាតិខ្មែរ បច្ចុប្បន្នរស់នៅភូមិ-ឃុំជាមួយគ្នា(រួមដំណើរ) ជនរងគ្រោះទាំង ២នាក់ ធ្វើដំណើររួមគ្នាក្នុងទិសដៅពី(លិចទៅកើត) ដោយម៉ូតូ ១គ្រឿងម៉ាក ហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ពោធិសាត់ 1F 2359 ។

ប្រភពព័ត៌មានខាងលើបន្តថា ចំណែករថយន្តក្រុមហ៊ុន រស្មីភ្នំពេញដឹកអ្នកដំណើរ បង្កម៉ាក ហុីយ៉ាន់ដាយ ពណ៏សឆ្នូតខៀវ ពាក់ស្លាកលេខ ភ្នំពេញ 3C 7676 ធ្វើដំណើរក្នុងទិសដៅពីកើតទៅលិច បើកជែងគេឯងទៅបុកម៉ូតូជនរងគ្រោះទាំងកម្រោលតែម្តែង អ្នកបើកបររថយន្តបង្កឃើញហេតុការណ៍បែបនេះក៍រត់គេចខ្លួនបាត់។

ប្រភពដដែលបន្តទៀតថា វត្ថុតាងម៉ូតូ និងរថយន្តបង្ក បានយកទៅរក្សាទុកនៅការិល័យចរាចរណ៍ផ្លូវគោក នៃស្នងការដ្ឋាននគរបាលខេត្តពោធិ៍សាត់ ដើម្បីរងចាំធ្វើការវាស់វែងដោះស្រាយតាមនីតិវិធី៕ បឹុម ពិន