សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ កំលាំងការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលនគរបាលខេត្ត សហការជាមួយកំលាំងជំនាញអធិការដ្ឋាននគរបាលស្រុកក្រគរ ប៉ុស្តិ៍នគរបាលរដ្ឋបាលក្បាលត្រាច ចុះយុទ្ធនាការប្រយុទ្ធប្រឆាំងបង្រ្កាបការជួញដូរដោយខុសច្បាប់នូវសារធាតុញៀន ក្នុងនោះកំលាំងឃាត់ខ្លួនបានចំនួន ០២នាក់ រួមទាំងវត្ថុតាង និងសម្ភារ ដើម្បីបំពេញនីតិវិធីដើម្បីបញ្ជូនបន្ត។
ប្រតិបត្តិការខាងលើនេះអនុវត្តន៍ឡើងកាលពីវេលាម៉ោង៩ និង៥៥នាទីព្រឹក ថ្ងៃទី១៥ ខែកុម្ភៈ ឆ្នាំ២០១៧ ស្ថិតក្នុងភូមិត្រពាំងរំដេញ ឃុំក្បាលត្រាច ស្រុកក្រគរ ខេត្តពោធិ៍សាត់។
លោក វរសេនីយ៍ត្រី ម៉ោល សុទ្ធ អធិការរងទទួលផែននគរយុត្តិធម៌ នៃអធិការដ្ឋាននគរបាលស្រុកក្រគរបានឲ្យដឹងថា ក្នុងកិច្ចប្រតិបត្តិការយុទ្ធនាការប្រយុទ្ធប្រឆាំងបង្រ្កាបការជួញដូរដោយខុសច្បាប់នូវសារធាតុញៀនខាងលើ កំលាំងឃាត់ខ្លួនជនសង្ស័យជួញដូរគ្រឿងញៀនចំនួន ០២នាក់ ទី១ ឈ្មោះ ខ្វៃ ម៉េន ភេទប្រុស អាយុ ២៦ឆ្នាំ ជនជាតិខ្មែរ បច្ចុប្បន្នរស់នៅភូមិ-ឃុំកើតហេតុ និងទី២ ឈ្មោះ សឹុម សុទ្ធារិទ្ធ ភេទប្រុស អាយុ ២៧ឆ្នាំ ជនជាតិខ្មែរ បច្ចុប្បន្នរស់នៅភូមិចំការចេកខាងជើង សង្កាត់ផ្ទះព្រៃ ក្រុង-ខេត្តពោធិ៍សាត់។
លោក វរសេនីយ៍ត្រីបន្តថា ក្នុងយុទ្ធនាការខាងលើនេះដែរកំលាំងបានចាប់យកវត្ថុតាង រួមមានម្សៅក្រាមពណ៏សថ្លាសង្ស័យសារធាតុញៀនចំនួន ០១កញ្ចប់ធំ និងសម្ភារ ឧបករណ៍ផ្សេងៗផងដែរ ។
លោក វរសេនីយ៍ត្រីបន្តទៀតថា ចំពោះករណីខាងលើ ទាំងជនសង្ស័យត្រូវបានកំលាំងឃាត់ខ្លួន ទាំងវត្ថុតាង និងសម្ភារ កំលាំងកំពុងបំពេញនីតិវិធីនៅអធិការដ្ឋាននគរបាលស្រុកក្រគរ ដើម្បីបន្តបញ្ជូនទៅការិយាល័យជំនាញ នៃស្នងការដ្ឋាននគរបាលនគរបាលខេត្តចាត់កាបន្ត ៕ បឹុម ពិន
