សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ បុរសម្នាក់ធ្លាប់ជាប់គុកពីបទប្រើប្រាស់ ដោយខុសច្បាប់នូវសារធាតុញៀន អស់រយៈពេល៣ខែ ពេលចេញមកវិញមិនរាងចាលបន្តធ្វើសកម្មភាពជួញដូរគ្រឿងញៀន ត្រូវបានសមត្ថកិច្ចនគរបាលស្រុកអង្គស្នួលចាប់ខ្លួនជាថ្មីម្តងទៀតរួមជាមួយបក្ខពួកម្នាក់ និងឆែកឆេរលំនៅឋាន កាលពីវេលា១៣ និង៥០នាទី ថ្ងៃទី១៥ ខែកុម្ភៈ ឆ្នាំ២០១៧ ស្ថិតក្នុងភូមិត្រយឹង ឃុំពើក ស្រុកអង្គស្នួល ខេត្តកណ្តាល ។
មន្ត្រីនគរបាលស្រុកអង្គស្នួលបានឲ្យដឹងថា ជនសង្ស័យដែលត្រូវបានចាប់ខ្លួននោះទី១-ឈ្មោះ សូរ សុខនាង ហៅឆ្នុក ភេទប្រុស អាយុ២៩ឆ្នាំ ជនជាតិខ្មែរ មុខរបរ កម្មកររោងចក្រ មានទីលំនៅភូមិត្រយឹង ឃុំពើក ស្រុកអង្គស្នួល ។ ជនសង្ស័យរូបនេះធ្លាប់ជាប់ពន្ធនាគាររយៈពេល៣ខែ ពីបទប្រើប្រាស់ដោយខុសច្បាប់នូវសារធាតុញៀន ។ ទី២-ឈ្មោះ ខុន សុខូយ ហៅតូយ ភេទប្រុស អាយុ២៤ឆ្នាំ ជនជាតិខ្មែរ មុខរបរមិនពិតប្រាកដ បច្ចុប្បន្នស្នាក់នៅភូមិត្រយឹង ឃុំពើក ស្រុកអង្គស្នួល ។
ក្នុងប្រតិបត្តិការបង្រ្កាបចាប់ខ្លួន ឆែកឆេរលំនៅឋានជនសង្ស័យខាងលើនេះធ្វើឡើងតាមបទបញ្ជារបស់លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល និងមានការសម្របសម្រួលនីតិវិធីច្បាប់ពីលោក លឹម សុគន្ថា ព្រះរាជអាជ្ញាអមសាលាដំបូងខេត្ត ។ ជាលទ្ធផល សមត្ថកិច្ចបានធ្វើការរឹបអូសវត្ថុតាងពាក់ព័ន្ធរួមមាន៖ ថ្នាំញៀនប្រភេទមេតំហ្វេតាមីនហៅម៉ាទឹកកកចំនួន០២កញ្ចប់ ,ទូរស័ព្ទដៃម៉ាកណូគាចុចពិល០១គ្រឿង ,សម្ភារៈវេចខ្ចប់ និងឧបករណ៍សម្រាប់សេពគ្រឿងញៀនមួយចំនួនទៀតផងដែរ ។
ប្រភពដដែលបានបន្តថា ចាប់តាំងពីជនសង្ស័យខាងលើនេះចេញពីពន្ធនាគារវិញសមត្ថកិច្ចបានធ្វើការតាមដានពីសកម្មភាពរបស់ជនសង្ស័យ ដឹងថាមិនបានកែប្រែចិត្តគំនិតនោះទេ ពោលគឺរឹតតែធ្វើសកម្មភាពខ្លាំងជាងមុន ដោយប្រែពីអ្នកប្រើប្រាស់ទៅជាអ្នកជួញដូរ។ នៅថ្ងៃទី១៥ ខែកុម្ភៈ ឆ្នាំ២០១៧ សមត្ថកិច្ចក្តាប់បានព័ត៌មានច្បាស់ការថា ជនសង្ស័យរូបនេះមានរក្សាទុកគ្រឿងញៀនដើម្បីជួញដូរទៅឲ្យអ្នកប្រើប្រាស់ដែលជាកម្មកររោងចក្រ ទើបសមត្ថកិច្ចនគរបាលស្រុកសហការជាមួយនគរបាលប៉ុស្តិ៍ចុះធ្វើការស្រាវជ្រាវ រហូតឈានដល់បង្រ្កាបចាប់ខ្លួនជនសង្ស័យ រួមជាមួយបក្ចពួកម្នាក់ទៀត និងធ្វើការឆែកឆេរលំនៅឋានដកហូតវត្ថុតាងជាក់ស្តែង ដើម្បីចាត់ការតាមច្បាប់ ៕ ស្អាងជ័យ
