សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់ជិះម៉ូតូនិចមួយគ្រឿងក្នុងល្បឿនលឿនដល់ផ្លូវបំបែកជាបួនមិនប្រយ័ត្នជ្រុលបុករថយន្ដកាមរីឆ្លាមរបស់តារាសម្ដែង អឺម ជីវ៉ា ដែលកំពុងឆ្លងផ្លូវបណ្ដាលអោយរថយន្ដនិងម៉ូតូរងការខូចខាតបន្តិចបន្ទួួចចំណែកអ្នកជិះម៉ូតូរងរបួសស្រាល។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១២និង៣០នាទីរំលងអាធ្រាត ឈានចូលថ្ងៃទី១៧ ខែកុម្ភះ ឆ្នាំ២០១៧ នៅចំណុចផ្លូវលេខ៦៣ កែងនឹងមហាវិថីព្រះសីហនុ ស្ថិតក្នុងសង្កាត់ ចតុមុខ ខណ្ឌដូនពេញ រាជធានីភ្នំពេញ។
ប្រភពព័ត៌មានបានអោយដឹងថា នៅមុនពេលកើតហេតុគេបានឃើញរថយន្ដម៉ាកកាមរីឆ្លាម ពណ៍ស្ករ ពាក់ស្លាកលេខ ភ្នំពេញ2D-4532 ដែលជារថយន្ដរបស់តារាសម្ដែងឈ្មោះ អឹម ជីវ៉ា បានធ្វើដំណើរតាមបណ្ដោយផ្លូវលេខ៦៣ទិសដៅពីត្បូងទៅជើងហើយបានឆ្លងកាត់មហាវិថីព្រះសីហនុ ពេលដែលឆ្លងបានពាក់កណ្ដាលផ្លូវស្រាប់តែមានម៉ូតូម៉ាកនិចមួយគ្រឿងជិះដោយយុវជនម្នាក់ធ្វើដំណើរតាមបណ្ដោយមហាវិថីព្រះសីហនុទិសដៅពីកើតទៅលិចជ្រុលបុកចំក្បាលរថយន្ដចំហៀងខាងស្ដាំបណ្ដាលអោយរងការខូចខាតទាំងសងខាង ចំណែកអ្នកជិះម៉ូតូរងរបួសស្រាល។
ក្រោយពីកើតហេតុភាគីទាំងសងខាងបានធ្វើការសម្របសម្រួលគ្នាដោយម្ចាស់រថយន្ដមិនបានអោយម្ចាស់ម៉ូតូសងថ្លៃខូចខាតនោះទេព្រោះមិនចង់មានរឿងវែងឆ្ងាយ ហើយក៏បានសំណូមពរដល់អ្នកជិះម៉ូតូទាំងអស់សូមកុំអោយជិះម៉ូតូលឿនៗពេកព្រោះខ្លាចគ្រោះថ្នាក់ដល់ខ្លួនឯងនិងអ្នកដទៃផងដែរ។
ក្រោយពីសម្របសម្រួលគ្នារួចរាល់ភាគីទាំងសងខាងបានចែកផ្លូវគ្នាទៅផ្ទះរៀងៗខ្លួនតែម្ដង ៕ ព្រែកជ័យ
