សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោកតាម្នាក់ ជិះម៉ូតូធ្វើដំណើរឆ្លងផ្លូវត្រូវវរថយន្តកាមរីហើម បើកបុកចំពីមុខពេញទំហឹង បណ្តាលឲ្យបោកក្បាលស្លាប់ភ្លាមៗ យ៉ាងអាណោចអាធ័ម ។
ហេតុការណ៍នេះកើតឡើងកាលពីវេលាម៉ោង ៤និង១០នាទីរសៀល ថ្ងៃទី១៧ ខែកុម្ភៈ ឆ្នាំ២០១៧ នៅតាមបណ្តោយផ្លូវអូរដឹមកប់ស្រូវ ភូមិសំរោង សង្កាត់សំរោងក្រោម ខណ្ឌពោធិសែនជ័យ រាជធានីភ្នំពេញ។
មន្ត្រីនគរបាលចរាចរណ៍ប្រាប់ថា ជនរងគ្រោះឈ្មោះ ស៊ន សឿន ភេទប្រុស អាយុ៧៣ឆ្នាំ មុខរបរកសិករ មានទីលំនៅភូមិត្រពាំងធ្នង់ សង្កាត់សំរោងក្រោម ខណ្ឌពោធិសែនជ័យ ជិះម៉ូតូម៉ាកហុងដារគុបជ្រុង ពណ៍ទឹកប៊ិក ពាក់ស្លាកលេខ ភ្នំពេញ 1W-1716 ។
តាមប្រភពពីកន្លែងកើតហេតុ បានឲដឹងថា មុនពេលកើតហេតុ គេឃើញលោកតា ម្នាក់ជិះម៉ូតូម្នាក់ឯង តាមបណ្តោយផ្លូវអូរដឹមកប់ស្រូវ ទិសដៅពីត្បូងទៅជើង ល្បឿនយឺត ខណៈមកដល់ចំណុចកើត លោកតាបានបត់ឆ្លងផ្លូវមកខាងឆ្វេងដៃ ស្រាប់តែមានរថយន្តបង្កកាមរី ហើម ពណ៌ស្លែ ពាក់ស្លាកលេខ ភ្នំពេញ 2D-4434 បើកបរដោយបុរសម្នាក់ ទិសដៅពីជើងទៅត្បូង ក្នុងល្បឿនលឿន បានទៅបុកលោកតាពេញទំហឹង បណ្តាលឲ្យលោកតាដួលអូសនៅលើថ្នល់ជាង៣០មែ៉ត្រ ស្លាប់ភ្លាមៗនៅនឹងកន្លែង។
បន្ទាប់មករថយន្តបានបើកព្យាយាមរត់ទាំងខូតខាតផ្នែកមុខខាងឆ្វេង បើកឡើងទៅទិសខាងត្បូងសំដៅឡើងមកផ្លូវជាតិលេខ៤ ហើយបើករត់រហូតមកដល់ចំណុចស្ថានីយសាំងតូតាល់អូរដឹម ដោយសារកំពុងស្ទះ ទើប ម្ចាស់រថយន្តបានបើកយករថយន្តទៅទុកចោលនៅក្នុងការ៉ាស់សាំង ហើយគេចខ្លួនបាត់តែម្តង ។
ក្រោយកើតហេតុ ក្រុមគ្រួសារសពបានយកសពចេញពីកន្លែងកើតហេតុ ទៅផ្ទះដោយខ្លួនឯង បន្ទាប់មកសមត្ថកិច្ចមូលដ្ធាន និងជំនាញសហការនៅកន្លែងកើតហេតុ ទំនាក់ទំនងទៅជំនាញចរាចរណ៍រាជធានីចុះមកយករថយន្តបង្ក និងម៉ូតូរងគ្រោះទៅរក្សាទុកនៅការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញ ដើម្បីរង់ចាំការដោះស្រាយគ្នានៅពេលក្រោយ ៕ សុខាសែនជ័យ
