សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀងៈ មានហេតុការណ៍គ្រោះថ្នាក់ចរាចរណ៍គួរឲ្យរន្ធត់រវាងរថយន្តហាយឡេនឌ័រ បុកជាមួយរថយន្តដឹកស៊ីម៉ង់ត៍ពីក្រោយពេញទំហឹងលាន់សូរដូចរន្ទះបណ្ដាលឲ្យមនុស្សប្រុស៣នាក់រងរបួសធ្ងន់ ស្រាល កាលពីវេលាម៉ោង១និង១៥នាទីរសៀល ថ្ងៃទី៣ ខែមីនា ឆ្នាំ២០១៧ ត្រង់ចំណុចខាងលិចរង្វង់មូលរូបគោ សង្កាត់ព្រៃឆ្លាក់ ក្រុងស្វាយរៀង ។
យោងតាមសាក្សីបានឲ្យដឹងថា មុនកើតហេតុ គេឃើញមានបុរស៣នាក់ មិនត្រូវបានស្គាល់អត្តសញ្ញាណ បានបើករថយន្តមួយគ្រឿងម៉ាកហាយឡេនឌឺ ពណ៌មាស ពាក់ស្លាកលេខភ្នំពេញ២ AB ៨០២៨ ដោយធ្វើដំណើរលើកំណាត់ផ្លូវជាតិលេខ១ពីកើតទៅលិច ក្នុងល្បឿនលឿនខ្វះការប្រុងប្រយ័ត្នក៏ជ្រុលទៅបុករថយន្តដឹកសីុម៉ង់ត៍ពីក្រោយដែលកំពុងចតលើចញ្ចើមផ្លូវពីក្រោយយ៉ាងពេញទំហឹងលាន់សូរដូចរន្ទះ។
ក្រោយមក ក៏មានការភ្ញាក់ផ្អើលដល់អ្នកភូមិ ក៏ដូចជាអ្នកធ្វើដំណើរឆ្លងកាត់នាំគ្នាចោមរោមមើល និងរាយការណ៍មកសមត្ថកិច្ចមូលដ្ឋាន និងទាញយកបុរសទាំង៣នាក់ ដែលរងរបួសធ្ងន់ ស្រាលមកកាន់មន្ទីរពេទ្យបង្អែកខេត្តស្វាយរៀង ។
បន្ទាប់មក រថយន្តទាំងពីរត្រូវបានសមត្ថកិច្ចនគរបាលយកទៅរក្សាទុក នៅការិយាល័យនគរបាលចរាចរណ៍ខេត្តដើម្បីដោះស្រាយតាមផ្លូវច្បាប់ ៕ យឹម សុថាន
