សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្ទាវមួយ ក្រុមមានគ្នាប្រមាណ១៥នាក់ បានធ្វើសកម្មភាពកាប់ប្រហារទៅលើយុវជនម្នាក់ បណ្ដាលឲ្យរងរបួសធ្ងន់ និងត្រូវបាននគរបាល បញ្ជូនទៅកាន់មនី្ទរពេទ្យដើម្បីសង្គ្រោះបន្ទាន់ភ្លាមៗ ចំណែក ឯក្រុមជនដៃដល់បាននាំគ្នារត់គេចខ្លួនបាត់ស្រមោលអស់ កាលពីវេលាម៉ោង៣ទៀបភ្លឺ ថ្ងៃទី៥ នៅតាមផ្លូវវ៉េងស្រេង ត្រង់ចំណុចមុខក្លឹបឌីស្កូយីហោ “ហ្វាន់ក្លឹប” ស្ថិតនៅក្នុងភូមិជ្រៃកោង សង្កាត់ចោមចៅ ខណ្ឌពោធិ៍ សែនជ័យ ប៉ុន្តែឈាមស្រែក ស្បែកហៅ កម្លាំងនគរបាលប៉ុស្ដិ៍ ចោមចៅបានស្រាវជ្រាវ យ៉ាងដុតដៃដុតជើងរហូត ដល់វេលាម៉ោង១២ថ្ងៃត្រង់ ថ្ងៃទី៥ ខែមីនា ឆ្នាំ២០១៧ បានប្រទះឃើញជនសង្ស័យ៣នាក់កំពុងស្ថិត នៅជុំគ្នា នៅតាមផ្លូវវ៉េងស្រេង ត្រង់ចំណុច ភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ក៏ឡោមព័ទ្ធចាប់ខ្លួន និងបាននាំទៅសាកសួរនៅប៉ុស្ដិ៍ភ្លាមៗ និងកំពុងបន្តតាមចាប់ខ្លួនបក្ខពួក ផ្សេងទៀត។
ជនសង្ស័យដែលត្រូវចាប់ខ្លួននោះ ១, ឈ្មោះ យ៉ៅ យី អាយុ១៧ឆ្នាំ មុខរបរកម្មកររោងចក្រកាត់ដេរ ស្នាក់នៅផ្ទះជួលក្នុងភូមិដីថ្មី សង្កាត់ទឹកថ្លា ខណ្ឌសែនសុខ។ ២,ឈ្មោះ ញូង ចាន់ អាយុ១៩ឆ្នាំ មុខរបរកម្មកររោងចក្រ ផលិតកាវ ស្នាក់នៅ ផ្ទះជួល ភូមិប៉ប្រកខាងជើង សង្កាត់កាកាប ខណ្ឌពោធិ៍សែនជ័យ។ ៣,ឈ្មោះ អួន សៀងហៃ អាយុ២២ឆ្នាំស្នាក់នៅ ភូមិដីថ្មី សង្កាត់ភ្នំពេញថ្មី ខណ្ឌសែនសុខ និងមានស្រុកកំណើតជាមួយគ្នា និងមានស្រុកកំណើតនៅក្នុងភូមិចុងទួល ឃុំស្វាយជ្រុំ ស្រុក មេសាង ខេត្តព្រៃវែង។
ក្រោយពីឃាត់ខ្លួនជនសង្ស័យខាងលើ សមត្ថកិច្ចបានកសាង សំណុំរឿងបញ្ញូនទៅអធិការនគរបាលខណ្ឌបន្ត៕ សុខាសែនជ័យ
